Dede pas triumfit në Kurbini: Laçi meriton lëvdata, paraqitja jonë lë tablo pozitive

Egnatia ka arritur të sigurojë një fitore të rëndësishme në transfertë kundër Laçit, në kuadër të javës së gjashtë të Kategorisë Superiore, duke triumfuar me rezultatin 0-2 në stadiumin e Kurbinit. Pas përfundimit të këtij takimi, trajneri i skuadrës fituese, Nevil Dede, ka analizuar paraqitjen e të dyja skuadrave, duke mos kursyer vlerësimet për kundërshtarin, por edhe duke shprehur kënaqësinë për ecurinë e djemve të tij. "Për të qenë i sinqertë, duhet t'i bëj komplimente Laçit. Ata zhvillojnë një lojë që të argëton. Duhet thënë e vërteta, unë mendoj se kjo ishte një ndezje e re për ne, pasi më parë kishim vuajtur në disa ndeshje," u shpreh fillimisht tekniku i rrogozhinasve. Ai shtoi se skuadra e menaxhoi situatën në mënyrën e duhur, veçanërisht duke pasur parasysh angazhimet e ardhshme në arenën ndërkombëtare. Një tjetër element pozitiv që u theksua ishte edhe rikthimi i Bitrit në fushën e lojës. Duke folur për kalendarin e ngarkuar dhe mënyrën se si do t'i menaxhojë minutat mes kampionatit dhe Evropës, Dede theksoi se i gjithë grupi luan një rol kyç. Sipas tij, përvoja e skuadrës e lehtëson këtë situatë, ndërsa prioriteti mbetet shmangia e dëmtimeve dhe nisja e mbarë e aventurës evropiane. Në përmbyllje të prononcimit të tij, trajneri i Egnatias pranoi se sfida pati momentet e saj të vështira dhe se Laçi arriti t'i rrezikojë disa herë, duke përfshirë edhe një rast ku fatit iu desh të ndërhynte në ndihmë të skuadrës së tij pas goditjes në shtyllë.