Humbja ndaj Egnatias, trajneri Qatip Osmani zbulon arsyet e dështimit të Laçit

Laçi ka regjistruar një tjetër rezultat negativ në kampionat, pasi është mposhtur me shifrat 0-2 nga Egnatia në takimin e vlefshëm për javën e gjashtë të Kategorisë Superiore. Pas përfundimit të këtij dueli të zhvilluar në stadiumin e Kurbinit, trajneri i bardhezinjve, Qatip Osmani, ka analizuar paraqitjen e skuadrës së tij para mikrofonave të mediave. “Sigurisht që të vjen keq për këtë humbje. Në momentin që patëm iniciativën dhe krijuam raste shënimi, bëmë një gabim që nuk duhet të përsëritet. Megjithatë, duke parë angazhimin dhe lojën në tërësi, mendoj se nuk zhvilluam një ndeshje të keqe, edhe pse kjo nuk e zbeh peshën e këtij rezultati negativ”, u shpreh fillimisht tekniku i kurbinasve. Duke iu përgjigjur pyetjeve të gazetarëve mbi zgjedhjet taktike dhe shfrytëzimin e pakët të lojtarëve të avancuar si Traore me topa vertikalë, Osmani shpjegoi se kundërshtari kishte ngushtuar hapësirat. “Në pjesën e parë arritëm ta bënim këtë, por më pas Egnatia u mbyll mjaft mirë. Në fraksionin e dytë, me aktivizimin e Karajt dhe përpjekjet për të hapur lojën përmes Bekës, u munduam të krijonim hapësira për të provuar pasimet vertikale. Megjithatë, kundër një skuadre cilësore si Egnatia, pasaktësitë dhe gabimet tona na kushtuan shtrenjtë”, shtoi ai. Në fund të prononcimit të tij, strategu i Laçit u ndal te faktorët kryesorë që sollën këtë disfatë, duke veçuar papjekurinë taktike në momente kyçe të sfidës. “A është eksperienca i vetmi problem apo ka edhe problematika të tjera? Pa diskutim që po. Kur rezultati ishte i barabartë 0-0, ne sulmonim me gjashtë apo shtatë lojtarë. Edhe pas kalimit në avantazh të kundërshtarit me një gol disavantazh, rezultati mbetej i hapur dhe kishte kohë të mjaftueshme për të reaguar e barazuar. Këto janë qartësisht shenja të mungesës së eksperiencës”, përfundoi Osmani.