Tragjedia në rafinerinë e Greqisë: Ndërron jetë edhe punëtori i dytë shqiptar, pranga drejtuesve të kompanisë

Bilanci i viktimave nga shpërthimi i fuqisë në uzinën e “Motor Oil” në zonën e Agioi Theodoroi në Greqi është rënduar ndjeshëm, pasi ditën e diel, pak para orës 13:00, ka ndërruar jetë në spital edhe i plagosuri i dytë, 50-vjeçari Dorian Hysa. Shtetasi shqiptar ishte shtruar në gjendje kritike dhe i intubuar në Spitalin e Përgjithshëm “Thriasio” në Elefsinë, si pasojë e dëmtimeve të rënda në kokë. Pavarësisht ndërhyrjes intensive të stafit mjekësor për t'i shpëtuar jetën, ai nuk ka mundur t'u mbijetojë plagëve, duke e çuar në dy numrin e viktimave nga ky aksident i rëndë në punë. Kujtojmë se pak ditë më parë, konkretisht më 9 tetor, humbi jetën në të njëjtin spital edhe 43-vjeçari tjetër me origjinë shqiptare, Robert Cakaj, i cili kishte pësuar djegie dhe plagë të shumta, ndërkohë që ndodhej i shtruar në Njësinë e Djegieve. Ndërkohë, autoritetet policore greke kanë nisur një hetim të thelluar për të verifikuar mangësitë e mundshme në protokollet e sigurisë gjatë kryerjes së punimeve të mirëmbajtjes. Si rrjedhim i hetimeve paraprake, policia ka proceduar me arrestimin e tre drejtuesve të kompanisë “Motor Oil”, të cilët mbanin përgjegjësi direkte për mbikëqyrjen e projektit në fjalë.