Real Madridi në alarm: Vinicius Junior rrezikon seriozisht pjesëmarrjen në “El Clasico” pas kartonit të kuq

Klubi i Real Madridit mund të mbetet pa shërbimet e sulmuesit kryesor, Vinicius Junior, në superpërballjen e ardhshme kundër Barcelonës, e cila do të zhvillohet pas dy javësh. Ylli brazilian është tani në pritje të vendimit zyrtar nga Komisioni Disiplinor. Incidenti ndodhi mbrëmjen e 10 tetorit, kur sulmuesi u ndëshkua me karton të kuq direkt në minutën e 72-të të takimit, pasi iu anulua një gol dhe u përfshi në një përplasje fizike ku tërhoqi nga flokët një lojtar të Vijarealit. Pakënaqësia e brazilianit me vendimin e arbitrit u shfaq hapur përmes një reagimi agresiv në fushë. Sjellja e tij pas ndëshkimit është dokumentuar gjerësisht në raportin zyrtar të gjyqtarit Isidro Diaz de Mera Eskuderos. Arbitri ka shënuar se pas daljes me karton të kuq, lojtari ka vazhduar protestat me zë të lartë dhe është afruar drejt tij me qëndrim agresiv, aq sa është dashur ndërhyrja e bashkëlojtarëve për ta mbajtur, megjithëse fjalët e sakta nuk janë kuptuar plotësisht. Për shkak të kësaj sjelljeje të vlerësuar si antisportive, Vinicius rrezikon një dënim prej dy deri në tri ndeshje pezullimi. Nëse kjo masë merret parasysh, ai do të mungojë detyrimisht në sfidën ndaj katalanasve, duke e kaluar ndëshkimin minimal prej një ndeshjeje për karton të kuq. Pas përfundimit të ndeshjes, sulmuesi brazilian i kërkoi falje publike tifozëve të Real Madridit për ngjarjen. Megjithatë, ai nuk ngurroi të ngrisë zërin përmes një denoncimi publik, ku e cilësoi trajtimin dhe gjykimin ndaj tij në Spanjë si një standard të dyfishtë.