Eksperti i sigurisë alarmon: Skenari serb nga Banjska te “Bota Serbe” rrezikon paqen në rajon

Eksperti i fushës së sigurisë, Avni Islami, ka ngritur alarmin se politikat dhe hapat e ndërmarrë nga udhëheqja në Serbi përbëjnë një rrezik real dhe të vazhdueshëm për paqen dhe stabilitetin në Ballkan. Sipas tij, ngjarje si sulmi i armatosur në Banjskë, dëmtimi i infrastrukturës kyçe të kanalit të Ibër-Lepencit dhe promovimi i doktrinës së “Botës Serbe” dëshmojnë qartë për një strategji destruktive me sfond shtetëror. Islami ka theksuar se shfaqja publike e Milan Radoiçiqit në një tubim të Partisë Përparimtare Serbe (SNS) të udhëhequr nga Aleksandar Vuçiq, si dhe deklaratat e herëpashershme të Aleksandar Vulinit, dëshmojnë lidhjet e ngushta mes pushtetit në Beograd dhe strukturave të përfshira në incidente të dhunshme. Këto zhvillime, sipas tij, tregojnë se aktet e agresionit nuk kanë qenë aspak të izoluara, por pjesë e një plani të mirëorganizuar. Në vlerësimin e tij, koncepti hegjemonist i njohur si “Bota Serbe” shërben si një platformë e rrezikshme e luftës hibride, e cila synon të nxisë separatizmin dhe të minojë sovranitetin e shteteve fqinje. Gjithashtu, orientimi i hapur i Serbisë drejt Moskës dëshmon synimin e Beogradit për t'u shndërruar në një satelit të interesave ruse në zemër të Evropës Juglindore. Përballë këtyre sfidave dhe doktrinave radikale që mbështeten nga strukturat zyrtare serbe, eksperti i sigurisë vlerëson se institucionet vendase duhet të mbajnë një shkallë të lartë vigjilence. Ai sugjeron një bashkëpunim dhe bashkërendim të ngushtë të veprimeve me partnerët ndërkombëtarë, përfshirë NATO-n, Shtetet e Bashkuara të Amerikës dhe Bashkimin Evropian, për të garantuar mbrojtjen e sigurisë rajonale.