Vjedhja e kasafortës në Kavajë: Policia vë në pranga 46-vjeçarin, shpallet në kërkim bashkëpunëtori

Operacioni i koduar policor në Kavajë ka çuar në arrestimin e një 46-vjeçari, i cili dyshohet se gjatë orëve të natës ka hyrë në një dyqan veshjesh dhe ka grabitur kasafortën që pëahqërbente një shumë prej rreth 600 mijë lekësh, si dhe gjashtë aparate celulare. Blutë e Kavajës kanë arritur të sekuestrojnë në cilësinë e provës materiale kasafortën e grabitur, brenda së cilës ndodhej një pjesë e vlerës monetare, ndërkohë që vijojnë kërkimet intensive për kapjen e bashkëpunëtorit të tij 30-vjeçar. Ngjarja është zbardhur pasi menaxherja e një dyqani rrobash, që ndodhet në lagjen numër 3 të qytetit të Kavajës, ka denoncuar më datë 08.10.2026 se ambienti i saj i punës ishte vjedhur gjatë natës, duke u marrë kasaforta me fondin monetar dhe telefonat. Pas marrjes së njoftimit, strukturat e Komisariatit të Policisë Kavajë nisën menjëherë hetimet intensive, të cilat mundësuan zbardhjen e ngjarjes, identifikimin dhe kapjen e njërit prej autorëve të dyshuar, shtetasit M. L., 46 vjeç, banues në qytet. Gjatë kontrollit të ushtruar në banesën e 46-vjeçarit, efektivët e policisë zbuluan dhe sekuestruan kasafortën e grabitur bashkë me fondin monetar që ndodhej brenda saj, duke siguruar provat e nevojshme materiale për ngjarjen. Në kuadër të të njëjtit operacion, autoritetet kanë identifikuar edhe personin e dytë të përfshirë, shtetasin A. S., 30 vjeç, banues po ashtu në Kavajë, i cili është shpallur në kërkim zyrtar ndërsa vijojnë veprimet për kapjen e tij. Materialet e plota procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Durrës, ku personat e përfshirë do të përgjigjen ligjërisht për veprën penale të vjedhjes.