Ambasadori Kiçmari: Thellimi i marrëdhënieve kulturore dhe miqësisë mes Kosovës dhe Japonisë

Ambasadori i Republikës së Kosovës në Japoni, Sabri Kiçmari, ka njoftuar se misioni diplomatik kosovar ka marrë pjesë në Festivalin tradicional të Qytetit Minato, i organizuar në prefekturën e Tokios, një ngjarje kjo kushtuar promovimit të diversitetit kulturor, bashkëpunimit dhe miqësisë ndërmjet komuniteteve. Sipas shefit të misionit diplomativ, ky aktivitet dyditor ka shërbyer si një platformë e shkëlqyer për të afruar edhe më shumë dy popujt, duke çuar përpara vlerat e mirëkuptimit të ndërsjellë dhe shkëmbimeve kulturore. Një nga pikat më kulminante të kësaj pjesëmarrjeje ka qenë vizita e kryetares së Bashkisë së Minato-s, Ai Seike, në hapësirën e rezervuar për Ambasadën e Kosovës. Ambasadori Kiçmari ka vlerësuar lart këtë takim, duke e cilësuar si një dëshmi e qartë e partneritetit të fortë dhe lidhjeve miqësore ndërmjet dy shteteve tona. Në fund,faqja zyrtare e ambasadës ka përcjellë falënderime të sinqerta për udhëheqjen e qytetit të Minato-s dhe stafin organizativ për pritjen dhe mundësinë e krijuar për të festuar bashkërisht vlerat e përbashkëta.