Operacioni “LAST DRIVE II”: Kapet në Kamëz 29-vjeçari që transportonte pistoletë, iu zbulua edhe armë gjahu në banesë

Strukturat e Policisë së Shtetit kanë finalizuar me sukses operacionin e koduar “LAST DRIVE II”, duke prangosur në flagrancë një 29-vjeçar nga Kruja, i cili lëvizte i armatosur me qëllim trafikimin e armëve. Aksioni u zhvillua në zonën e Kamzës pas një pune intensive investigative dhe informacioneve të siguruara në rrugë operative. Në pranga ka rënë shtetasi E. C., 29 vjeç, banues në Krujë, i cili më parë rezulton të jetë dënuar për veprën penale të trafikimit të mjeteve motorike. Gjatë ndërhyrjes, Forca e Posaçme Operacionale në bashkëpunim me Seksionin për Hetimin e Trafiqeve të Paligjshme bëri të mundur bllokimin e automjetit që drejtohej prej tij, ku brenda u gjet e u sekuestrua një armë zjarri pistoletë. Kontrollet e autoriteteve janë shtrirë më tej edhe në banesën e të dyshuarit. Aty efektivët e policisë kanë zbuluar dhe sekuestruar një armë gjahu pa leje, e cila mbahej së bashku me 50 fishekë. Po ashtu, gjatë kontrollit fizik dhe të mjeteve të tij, u konfiskuan një automjet, një aparat celular, si dhe një bllok shënimesh ku dyshohet se regjistroheshin shuma të ndryshme monetare. Në kuadër të këtij procedimi, autoritetet kompetente kanë nisur menjëherë një hetim pasuror ndaj të riut. Materialet e plota procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, ku ai do të përgjigjet për veprat penale të “Trafikimit të armëve dhe municionit” dhe “Fshehjes së të ardhurave”.