Kreu i ekzekutivit bullgar uron Albin Kurtin për mandatin e ri dhe e fton në një vizitë zyrtare

Kryeministri i Republikës së Kosovës, Albin Kurti, ka pranuar një mesazh urimi nga homologu i tij bullgar, Rumen Radev, me rastin e krijimit të qeverisë së re dhe marrjes së detyrës zyrtare. “Kam kënaqësinë t’ju shpreh urimet e mia më të sinqerta me rastin e formimit të suksesshëm të qeverisë së re dhe marrjes së detyrës së Kryeministrit të Republikës së Kosovës. Dinamika e marrëdhënieve ndërkombëtare kërkon përpjekje të vazhdueshme për mbrojtjen efektive të interesave kombëtare. Angazhimi juaj i palodhur për konsolidimin e Kosovës si anëtare e pavarur dhe e denjë e bashkësisë ndërkombëtare përbën një arsye të fortë për të besuar në suksesin e misionit tuaj”, ka shkruar kryeministri Radev në letrën e tij drejtuar kreut të qeverisë kosovare. Gjatë këtij komunikimi zyrtar, shefi i ekzekutivit bullgar rikonfirmoi gjithashtu mbështetjen e palëkundur të shtetit të tij për rrugëtimin eurointegrues të Kosovës. “Ju siguroj për gatishmërinë e qeverisë së drejtuar prej meje për të vazhduar mbështetjen për ofrimin e një perspektive të qartë për anëtarësimin e Republikës së Kosovës në Bashkimin Evropian, si dhe për anëtarësimin e plotë të vendit tuaj në Këshillin e Evropës”, theksohet tutje në letrën e urimit. Në fund të këtij mesazhi, me synim intensifikimin e bashkëpunimit ndërshtetëror, kryeministri Radev ka adresuar edhe një ftesë zyrtare drejtuar kryeministrit Kurti për të vizituar Bullgarinë në një të ardhme të afërt. “Marrëdhëniet e shkëlqyera dypalëshe dhe kontaktet miqësore personale përbëjnë një bazë të mirëfilltë për thellimin e mëtejshëm të lidhjeve ndërmjet nesh. Jam i bindur se një vizitë juaja zyrtare në Bullgari në të ardhmen e afërt do të kontribuojë ndjeshëm në ngritjen e partneritetit ndërmjet dy vendeve tona në një nivel të ri, më të lartë. Ju lutem pranoni, i nderuar zoti Kryeministër, shprehjen e konsideratës sime më të lartë”, përfundoi letrën kryeministri Radev.