Mbyllet sipari i javës së tetë në Superligën e Kosovës: Prishtina dhe Dukagjini maten sonte për pikët e radhës

Këtë mbrëmje do të ulë siparin xhiroja e tetë e Albi Mall Superligës së Kosovës në futboll, ku në stadiumin “Kampioni Nacional” do të përballen Prishtina dhe Dukagjini, me fillim nga ora 18:00. Kjo sfidë përbën aktin e fundit të kësaj jave, e cila deri më tani ka dhuruar emocione, ndeshje të forta dhe rezultate minimale në shumicën e dueleve të zhvilluara. Në ndeshjet paraprake të kësaj xhiroje, Vushtrria triumfoi ndaj Gjilanit me shifrat 1-0, ndërsa Malisheva arkëtoi tri pikë të arta si mysafire kundër Dritës, duke fituar po ashtu me rezultat 1-0. Një tjetër fitore me rëndësi jashtë fushës së vet regjistroi edhe Ballkani, i cili mposhti Llapin në Podujevë me rezultatin 1-0, duke rrëmbyer pikët e plota. Në krahun tjetër, e vetmja sfidë që nuk solli një fitues ishte ajo mes Drenicës dhe Feronikelit, e cila u mbyll pa fitues dhe me katër gola të shënuar, duke përfunduar 2-2. Tashmë, sytë e opinionit sportiv janë drejtuar nga ky duel përmbyllës mes Prishtinës dhe Dukagjinit, ku të dyja skuadrat synojnë maksimumin për të mbyllur këtë javë me një paraqitje pozitive.