“Kjo rrugë çon në luftë” – Reagimi i ashpër i ish-ministrit gjerman ndaj ëndrrave territoriale të Daçiqit për Prizrenin

Ish-ministri gjerman për Evropën, Michael Roth, ka dhënë një përgjigje të prerë dhe kritike ndaj deklaratave nacionaliste të zyrtarit serb, Ivica Daçiq, i cili kishte deklaruar se flamuri i Serbisë do të valojë sërish mbi qytetin e Prizrenit. Nëpërmjet një reagimi publik, diplomati gjerman e ka dënuar këtë qëndrim, duke e cilësuar atë si një hapur pretendim territorial kundër një shteti fqinj që cenon stabilitetin rajonal. “Serbia e gjorë! Ivica Daçiq dëshiron që flamuri serb të valojë mbi Prizren. Pretendimet territoriale ndaj një fqinji më lënë pa fjalë”, ka theksuar Roth në mesazhin e tij. Më tej, ai u ka bërë thirrje qytetarëve me të drejtë vote në Serbi që të tregojnë kujdes maksimal dhe të mendojnë mirë se çfarë të ardhmeje po zgjedhin në procesin zgjedhor të 25 tetorit. “Kjo rrugë çon drejt luftës. Nuk çon drejt Bashkimit Evropian. Më nuk ka para të BE-së për Serbinë!”, ka përfunduar paralajmërimin e tij ish-ministri gjerman Roth.