Transformimi i Malësisë së Madhe dhe Përmetit, Rama: Realiteti në terren ndryshon nga ajo që serviret në ekranet e Tiranës

Kryeministri Edi Rama ka sjellë në vëmendje transformimin rrënjësor të Malësisë së Madhe dhe Përmetit gjatë viteve të fundit, duke i cilësuar ato si shembuj të qartë të zhvillimit të vendit. Gjatë episodit më të fundit të podkastit të tij të përjavshëm “Flasim”, kreu i Qeverisë është ndalur te ndryshimet e mëdha infrastrukturore dhe ekonomike në këto dy zona. Sipas shefit të ekzekutivit, dikur këto rajone vlerësoheshin si zona pa perspektivë dhe të izoluara, ndërsa sot janë shndërruar në atraksione kyçe të turizmit dhe zhvillimit. Megjithatë, ai ka ngritur një kontrast mes realitetit të prekshëm në këto zona dhe perceptimit që krijohet në kryeqytet, duke theksuar se jeta reale shpesh errësohet nga narrativat e ekraneve dhe rrjeteve sociale. “Njëherë e një kohë, por jo një shekull më parë, para vetëm një dekade, qoftë Malësia e Madhe apo Përmeti ishin ndër ato pika në hartën e Shqipërisë që dukeshin shumë larg, si vende pa asnjë shpresë, ku kush ishte aty qëndronte thjesh nga halli dhe të nesërmen largohej, ndërsa vizitorët vinin vetëm për arsye familjare, si dasma apo vaki”, u shpreh Rama. Në vijim të fjalës së tij, kryeministri përmbylli duke vënë në dukje se sot këto dy bashki janë kthyer në destinacione të rëndësishme të Shqipërisë së re, e cila është ndërtuar me sakrifica të mëdha, ndërkohë që në bulevardin e Tiranës ngjarjet dhe puna e bërë shpesh mbulohen nga retë artificiale të kanaleve sociale dhe ekraneve.