Ndryshimi i strategjisë në ATK: Bien ndëshkimet për bizneset, rritet fokusi te këshillimi

Administrata Tatimore e Kosovës ka shënuar një ulje të masave ndëshkuese ndaj bizneseve për rreth 7 deri në 8 për qind gjatë gjysmës së parë të këtij viti, duke reflektuar një orientim të ri institucional drejt mbështetjes dhe udhëzimit të tatimpaguesve. Duke folur në podcastin “Ekonomia pa filtra”, drejtori i ATK-së, Mentor Hyseni, theksoi se institucioni që ai drejton ka zgjedhur një rrugë ku mbizotëron këshillimi e jo masa ndëshkuese. Sipas tij, gjobat janë shpenzime të panevojshme për ekonominë e familjeve dhe bizneseve, të cilat shpesh paguhen për shkak të neglizhencës. Ai përsëriti se pavarësisht rritjes së aktiviteteve të tjera, ndëshkimet kanë rënë me rreth 8 për qind falë qasjes së re të promovuar nga ATK-ja. Në lidhje me sfidën e korrupsionit, Hyseni pranoi se institucioni nuk është tërësisht i mbrojtur nga dukuri të tilla, por shtoi se është e parakohshme të jepen konkluzione pa pasur vendime gjyqësore të formës së prerë. Ai bëri të ditur se aktualisht janë rreth 5 zyrtarë që ndodhen nën masën e pezullimit për shkak të hetimeve, dyshimeve apo nisjes së procedurave disiplinore. I pyetur mbi mundësinë e ndikimit apo presionit politik, drejtori i ATK-së sqaroi se i vetmi presion në kuptimin pozitiv janë objektivat e vendosura nga Ministria e Financave. Ai tregoi se gjatë pesë viteve të fundit të hyrat vjetore janë rritur mesatarisht mes 12 dhe 13 për qind, ndërsa këtë vit kjo rritje ka kapur shifrën prej 14 për qind, duke tejkaluar periudhat e kaluara. Në kuadër të përpjekjeve për të luftuar ekonominë e hijeve, Hyseni shtoi se vëmendja është përqendruar te zgjerimi i rrjetit tatimor dhe kapja e bizneseve që ushtrojnë veprimtari pa u regjistruar. Ai përmendi nisjen e projektit të stikerave për evidentimin e subjekteve formale, ndërkohë që faza pasardhëse do të shërbejë për të zbuluar ato që ende operojnë jashtë sistemit ligjor.