Sezoni turistik në Sarandë: Mbi 687 mijë udhëtarë në port, shënohet rritje e anijeve turistike

Porti i Sarandës ka shërbyer si portë hyrëse dhe dalëse për 687 594 pasagjerë gjatë periudhës janar-shtator të vitit 2026, duke ruajtur të njëjtin ritëm të lëvizjes së udhëtarëve krahasuar me 686 398 pasagjerët e regjistruar në të njëjtën periudhë të vitit 2025. Intensiteti i lartë i udhëtarëve është regjistruar kryesisht gjatë muajve të verës, ndërkohë që vërehet edhe një shtim i numrit të anijeve turistike që kanë zgjedhur të ankorohen në këtë port. E pyetur për këtë ecuri, përgjegjësja e përpunimit të anijeve dhe trageteve në portin e Sarandës, Hatixhe Ismaili, bëri të ditur se përgjatë nëntëmujorit të këtij viti janë regjistruar 338 250 pasagjerë në hyrje dhe 349 344 të tillë në dalje. Sipas saj, në totalin e lëvizjeve hyrëse dhe dalëse është shënuar një rritje modeste prej 1196 pasagjerësh ose 0.2 %, krahasuar me vitin e kaluar. Nga ana tjetër, numri i udhëtarëve që kanë lënë vendin nëpërmjet këtij porti është rritur nga 346 824 në 349 344 pasagjerë. “Kurse në hyrje krahasuar me vitin e kaluar ka një rënie të lehte 1324 pasagjerë më pakë dhe konkretisht për 9 mujorin 2026 kanë hyrë 338250 pasagjerë nga 339574 në të njëjtën periudhë të 2025-ës”, deklaroi Ismaili. Muajt që kanë shënuar edhe fluksin më të lartë të mbërritjeve mbeten qershori, korriku, gushti dhe shtatori. Më konkretisht, në qershor u regjistruan 108 461 hyrje, në korrik 154 524, në gusht 179 130 dhe në muajin shtator 128 014 udhëtarë. Ky fluks i lëvizjeve të udhëtarëve shoqërohet gjithashtu me një zgjerim të aktivitetit të mjeteve lundruese turistike. “Numri i anijeve turistike të ankoruara në Portin e Sarandës si 9-mujor shkon në 59 nga 51 në vitin 2025, ndërsa tragetet kruiz janë 26 në të dy vitet. Kurse për mjetet lundruese si jahte, veliera, skafe etj, që janë akostuar në port për të dyja vitet është i njëjti numër rreth 340”, u shpreh ajo. Pavarësisht këtij interesi, ajo solli në vëmendje faktin se infrastruktura aktuale e Portit të Sarandës vuan nga mungesa e kapaciteteve të mjaftueshme për akostimin e mjeteve lundruese luksoze. “Mungesa e marinave për këto mjete bëjnë që një numër i konsiderueshëm të qëndrojë në radë (gjiri i Sarandës) pa patur mundësinë të bregëzohen në port”, theksoi Ismaili. Në përgjithësi, të dhënat tregojnë se lëvizja e pasagjerëve në Portin e Sarandës ka qëndruar e qëndrueshme, duke reflektuar vetëm luhatje të lehta në të dyja drejtimet. Duke mbetur një nyjë kyçe e transportit detar dhe turizmit në jug të vendit, Porti i Sarandës vazhdon të përballet me flukse të mëdha vizitorësh vendas dhe të huaj, sidomos gjatë muajve të nxehtë të sezonit veror.