Trump paralajmëron përfshirjen e mundshme të SHBA-së kundër Huthive pas sulmit tragjik në Riad

Presidenti i Shteteve të Bashkuara, Donald Trump, ka deklaruar se Uashingtoni po shqyrton seriozisht mundësinë e angazhimit ushtarak përkrah Arabisë Saudite kundër rebelëve Huthi në Jemen. Ky reagim vjen pas një sulmi të përgjakshëm që tronditi Aeroportin Ndërkombëtar King Khalid në Riad, ku humbën jetën 12 persona dhe u plagosën 309 të tjerë. Sipas të dhënave nga CBS News, ngjarja e rëndë u regjistrua të shtunën, ndër mes viktimave konfirmohet se është edhe një shtetas amerikan. Autoritetet në Arabi Saudite bëjnë me dije se një pjesë e të lënduarve janë në gjendje kritike për jetën, ndërkohë që fluturimet dhe operacionet në këtë aeroport u ndërprenë përkohësisht.

Duke folur rreth një ndërhyrjeje të mundshme amerikane në këtë fushatë, kreu i Shtëpisë së Bardhë u shpreh se kjo alternativë po vlerësohet dhe një vendim mund të merret së shpejti. “Ne mund ta bëjmë këtë. Do ta shqyrtojmë”, ka theksuar ai.

Edhe agjencia e lajmeve Associated Press (AP) e ka cilësuar këtë sulm si një përshkallëzim alarmant të luftimeve në rajon, në një periudhë kur Mbretëria Saudite po përballet vazhdimisht me goditje nga grupi Huthi, i cili gëzon mbështetjen e Iranit.

Nga ana e tij, sekretari amerikan i Shtetit, Marco Rubio, ka dënuar ashpër sulmet ndaj territorit saudit, duke konfirmuar humbjen e jetës së shtetasit amerikan. Uashingtoni i ka etiketuar sulmet mbi objektiva civile si plotësisht të papranueshme, duke ritheksuar mbështetjen e palëkundur për Riadin.

Në vazhdën e këtyre zhvillimeve, presidenti Trump paralajmëroi se do të ketë një bisedë telefonike me princin e kurorës saudite, Mohammed bin Salman, për të analizuar situatën e re të sigurisë.

Kjo ngjarje ndodh në një kohë kur tensionet në Lindjen e Mesme kanë arritur kulmin, duke rrezikuar zgjerimin e mëtejshëm të konfliktit jemenas. Një përfshirje e drejtpërdrejtë e forcave amerikane në krah të operacioneve saudite do të përbënte një kthesë të madhe ushtarake dhe gjeopolitike për të gjithë rajonin.