Tragjedi në Gjirokastër: Ndërron jetë 48-vjeçari që u plagos nga shpërthimi i tritolit në makinë

Beqir Devolli, 48 vjeç, ka ndërruar jetë rrugës për në spitalin e Tiranës, pasi nuk ka mundur t'i mbijetojë plagëve të rënda të marra nga një atentat me tritol. Ngjarja e rëndë ndodhi mbrëmjen e së shtunës, kur automjeti i tij tip “Mercedes-Benz” u trondit nga një shpërthim i fuqishëm ndërsa ishte në lëvizje në qytetin e Gjirokastrës. Sipas njoftimit zyrtar nga ana e Policisë së Shtetit, drejtuesi i mjetit ndërroi jetë gjatë fazës së transportimit drejt kryeqytetit për ndihmë më të specializuar mjekësore. Ndërkohë, pasagjeri që ndodhej në automjet, i identifikuar si Erigers Mela, 26 vjeç, po merr trajtimin e nevojshëm mjekësor dhe fatmirësisht ndodhet jashtë rrezikut për jetën. Burimet zyrtare konfirmojnë paraprakisht se shpërthimi është shkaktuar me dashje nga vendosja e një sasi lënde plasëse në pjesën e automjetit. Forca të rendit dhe grupi i posaçëm hetimor ndodhen në terren dhe po vijojnë intesivisht hetimet për të zbardhur rrethanat e plota të ngjarjes, si dhe për të bërë të mundur identifikimin dhe vënien para drejtësisë të autorit apo autorëve të përfshirë. Viktimha Beqir Devolli njihej në mjedisin lokal me nofkën “Çilo Hundëderri”, ndërsa autoritetet po hetojnë në disa pista, ku nuk përjashtohen dyshimet e mundshme për lidhje të mëparshme të tij me aktivitetin e trafikut të lëndëve narkotike në shtetin grek.