Ankth mbi qiellin e Napolit: Stuhia dhe rrufetë pezullojnë për 20 minuta uljen e avionit nga Tirana

Pasagjerët e një fluturimi të kompanisë 'Ryanair' nga Tirana drejt Napolit kanë përjetuar momente të gjata tensioni në ajër, pasi mjeti fluturues e pati të pamundur të ulej menjëherë në aeroportin e destinacionit. Si pasojë e motit të ligë, avioni u detyrua të qëndrojë në pezullim për rreth 20 minuta, në pritje të përmirësimit të parametrave të sigurisë. Situata u bë ende më alarmante për shkak të një stuhie të fuqishme të shoqëruar me shkarkime elektrike dhe rrufe pranë avionit, çka rriti shkallën e panikut te të pranishmit në bord. Raportohet se udhëtarët përjetuan minuta të tëra ankthi gjatë kohës që avioni rrotullohej në qiell. Ajo që pritej të ishte një udhëtim rutinë mes kryeqytetit shqiptar dhe qytetit italian u shndërrua kështu në një sprovë të vërtetë frike. Pavarësisht dramacitetit të ngjarjes në ajër, nuk raportohet për incidente të mëtejshme apo probleme gjatë dhe pas procesit të uljes së avionit në pistë.