Ngjarjet e rënda tronditin Poloninë: Qeveria merr masa urgjente sigurie pas një serie sulmesh me thikë në shkolla

Një ngjarje e rëndë ka tronditur fshatin Leszczydół-Nowiny, në verilindje të Varshavës, ku një shkollë fillore u kthye në skenën e një krimi të rëndë. Rreth orës 09:00 të mëngjesit, një 15-vjeçar u fut në ambientet arsimore dhe goditi me thikë në qafë kujdestaren 37-vjeçare të shkollës. Pavarësisht ndërhyrjes me urgjencë të ekipeve mjekësore, nëna e dy fëmijëve ndërroi jetë në vendngjarje. Autoriteti dhe reagimi i shpejtë i drejtorit të shkollës dhe një mësueseje bënë të mundur neutralizimin e agresorit, megjithëse të dy mbetën të plagosur gjatë përleshjes. I dyshuari, i cili banonte në të njëjtën zonë dhe kishte diplomuar në këtë shkollë vetëm disa muaj më parë, mbante me vete tre thika. Po ashtu, u zbulua se ai mbante një helmetë të pajisur me kamerë me synimin për të xhiruar të gjithë sulmin. Ai u arrestua menjëherë nga forcat e rendit. Kjo ngjarje pason një tjetër incident të dhunshëm të ndodhur vetëm një ditë më parë në një shkollë profesionale në Ostrołęka, ku një 19-vjeçar plagosi nëntë persona – përfshirë nxënës, arsimtarë dhe dy kalimtarë – duke përdorur një mjet të mprehtë. Gjithashtu, në çantën e tij u gjend një mjet shpërthyes artizanal që nuk u aktivizua. Në të njëjtën ditë, policia në Sierpc arrestoi një 17-vjeçar që planifikonte një sulm të ngjashëm, pasi shokët e klasës alarmuan mësuesit për paralajmërimet e tij në rrjetet sociale. Seria e sulmeve ka alarmuar udhëheqjen shtetërore. Kryeministri polak Donald Tusk zhvilloi një takim të jashtëzakonshëm me drejtuesit e policisë dhe ministrat e linjës, ku përgëzoi guximin e stafit mësimor dhe njoftoi masa drastike sigurie. Nga ky moment, forcat e policisë do të forcojnë praninë e tyre përreth godinave shkollore dhe do të kryejnë patrullime të përditshme brenda ambienteve të tyre. Kryeministri Tusk e cilësoi këtë situatë si një sinjal të fortë paralajmërues për vendin, i cili deri më tani konsiderohej i sigurt nga incidente të tilla. Ai ngriti shqetësimin për përdorimin e kamerave nga të miturit gjatë krimeve dhe rrezikun e nxitjes së dhunës përmes të ashtuquajturave «sfida» në platformat digjitale si TikTok, YouTube apo Instagram. Qeveria po shqyrton gjithashtu mundësitë ligjore për të ndërhyrë më shpejt në bllokimin e përmbajtjeve me rrezikshmëri në internet.