Trump kërkon largimin e Zelenskyt: Kievi dhe aleatët evropianë i kundërpërgjigjen SHBA-së

Sinjalet e reja që po vijnë nga Uashingtoni, përfshirë një marrëveshje tregtare për naftën dizel me Moskën dhe thirrjet e Donald Trumpit për dorëheqjen e presidentit Volodymyr Zelensky, kanë ngritur shqetësime serioze në Kiev. Mospërputhjet e fundit po ngrenë pikëpyetje mbi të ardhmen e mbështetjes amerikane ndaj Ukrainës në përballjen e saj ushtarake me Rusinë. Ndaj këtyre zhvillimeve ka reaguar menjëherë shefi i diplomacisë ukrainase, Andrij Sybiha. Përmes një postimi në platformën X, ministri i Jashtëm theksoi se Zelensky gëzon mbështetjen e plotë të popullit të tij, i cili është i vetmi që ka të drejtë të vendosë për udhëheqjen e vendit. Sybiha nënvizoi se presionet nga jashtë vetëm sa e konfirmojnë përkushtimin e presidentit ukrainas, duke shtuar: "Deklaratat që vijnë nga jashtë vetëm sa tregojnë se ai po e kryen mirë detyrën e tij. Ai meriton mbështetje." Sidoqoftë, ish-presidenti amerikan Donald Trump ka intensifikuar kritikat e tij, duke deklaruar se "ka ardhur koha që Ukraina të ketë një president të ri", i cili do të ishte i gatshëm t'i japë fund luftës me Rusinë. Trump pretendon se Moska është e gatshme për marrëveshje, por sipas tij, është Zelensky ai që nuk dëshiron një të tillë. Mirëpo, këto deklarata anashkalojnë faktin se Kushtetuta e Ukrainës ndalon kategorikisht mbajtjen e zgjedhjeve gjatë periudhës së gjendjes ushtarake, si dhe dështimet e deritanishme të përpjekjeve diplomatike. Realiteti në terren dëshmon se konflikti nuk u nxit nga Ukraina, por nga Rusia, e cila pushtoi vendin fqinj më shumë se katër vjet e gjysmë më parë. Ndërsa Zelensky ka shprehur disa herë gatishmërinë për bisedime të drejtpërdrejtë me kreun e Kremlinit, Vladimir Putin, ky i fundit i ka refuzuar kategorikisht ftesat për takime dhe ka hedhur poshtë propozimet për armëpushim pa kushte. Gjithashtu, disa nisma diplomatike për përfundimin e luftës kanë dështuar pa sjellë rezultate konkrete. Qëndrimi i Trumpit ka nxitur reagime me ton të ashpër edhe brenda vetë SHBA-së. Ish-zëvendëspresidenti Mike Pence paralajmëroi në platformën X kundër dhënies së një "litari shpëtimi makinës luftarake të Putinit”. Pence theksoi: "Putini nuk dëshiron paqe. Putini dëshiron Ukrainën. Nuk kam asnjë dyshin: nëse Putini do ta pushtonte Ukrainën, do të ishte vetëm çështje kohe derisa ushtria ruse të kalonte një kufi ku trupat tona do të detyroheshin të përballeshin me të." Reagime të forta kanë ardhur edhe nga Evropa. Ministrja gjermane e Familjes, Karin Prien, e cilësoi qëndrimin e administratës amerikane si një papërgjegjshmëri të madhe, duke shkruar në X: "Për disa litra naftë dizel. Çfarë falimentimi moral." Në të njëjtën kohë, një zëdhënës i qeverisë gjermane rikonfirmoi se mbështetja e Berlinit për mbrojtjen e Ukrainës mbetet e palëkundur. Ndërkaq, kryetarja e Komisionit për Mbrojtjen në Parlamentin Evropian, Marie-Agnes Strack-Zimmermann, shprehu një kritikë të ashpër ndaj Trumpit, duke deklaruar se kërkesa për largimin e Zelenskyt e rreshton atë krah agresorit: "Nëse Trumpi i kërkon Zelenskyt të largohet nga posti, ai po vendoset qartë në anën e vrasësit."