Përgjigja e ashpër e Totajt ndaj Daçiqit: Prizreni është vatër e lirisë dhe vlerave perëndimore

Kryetari i Komunës së Prizrenit, Shaqir Totaj, i është kundërpërgjigjur ashpër deklaratës provokuese të zëvendëskryeministrit serb, Ivica Daçiq, i cili kishte deklaruar se një ditë flamuri serb do të valëvitet në këtë qytet. Nëpërmjet një reagimi të publikuar në rrjetet sociale, kreu i Prizrenit ka ironizuar me zyrtarin e lartë serb, duke u shprehur se ai duket se ka ngatërruar hartën e realitetit me listën e tij personale të këngëve nostalgjike të dasmave. Totaj ka theksuar se përpara se të fantazojë për skenarë të tillë, Daçiq do të duhet të kalojë përmes pranisë së trupave të KFOR-it, Policisë së Kosovës dhe institucioneve sovrane të vendit. "Në fund të fundit, Prizreni mbetet kryeqyteti kulturor dhe historik ku valëviten flamujt e jetës reale, progresit dhe aleancave perëndimore", ka përfunduar reagimin e tij kryetari Totaj.