Skandali në diplomaci: Ambasadorja e SHBA-së në Greqi, Kimberly Guilfoyle, nën hetim për pretendimet financiare dhe lobim

Ambasadorja e Shteteve të Bashkuara në Greqi, Kimberly Guilfoyle, si dhe misioni diplomatik amerikan në Athinë, janë vënë në shënjestër të një hetimi zyrtar nga Zyra e Inspektorit të Përgjithshëm pranë Departamentit të Shtetit. Ky zhvillim i rëndësishëm është konfirmuar për mediat ndërkombëtare nga dy burime të informuara mbi çështjen. Procedurimi hetimor ka marrë jetë pas ngritjes së pretendimeve për kërkesa të parregullta financiare, sjellje joetike në ambientet e punës dhe lidhje të dyshimta me subjekte private. Konsulenti ligjor dhe njohur gjithashtu si donator i Donald Trump, Eric Deters, ka hedhur akuza të forta ndaj Guilfoyle, duke pohuar se ajo i kishte kërkuar shlyerjen e një faturë prej 100.000 dollarësh në American Express, pak përpara seancës së saj të konfirmimit në vitin 2025. Sipas dëshmisë, si kundërshpërblim, asaj i ishte premtuar qasje e drejtpërdrejtë te zyrtarët e lartë. Komunikimet e shkëmbyera ndërmjet palëve, të zbardhura më parë nga shtypi i huaj, dëshmojnë se ajo e kishte udhëzuar Deters që fondet t'i përcillte direkt te American Express, me arsyetimin “që të mos dukeshin gjundkujt”. Paralelisht, burimet pranë çështjes flasin për një klimë toksike brenda ambasadës, të shoqëruar me pretendime për abuzim verbal, shpenzime luksoze dhe shfrytëzim të avionëve privatë për udhëtime. Në qendër të vëmendjes kanë dalë edhe kontaktet e dyshimta të diplomates me kompaninë greke të energjisë dhe ndërtimit, Aktor Group, si dhe me lobistin e saj Christos Marafatsos, i cili është parë rregullisht në takime zyrtare përkrah ambasadores. Një rast i spikatur është ai i datës 18 prill 2026 në Tiranë, gjatë një takimi me kryeministrin Edi Rama, ku u diskutua një marrëveshje dyvjeçare për gazin e lëngshëm natyror (LNG), që përfshinte entitetin Aktor LNG USA. Përballë këtyre zhvillimeve, ligjvënësit demokratë në Kongres kanë kërkuar hapjen e hetimeve dhe dorëzimin e dokumentacionit përkatës, ndërkohë që sekretari Marco Rubio ka dalë në mbështetje publike të ambasadores. Nga ana e tyre, Guilfoyle dhe ekipi i saj juridik i kanë hedhur poshtë kategorikisht të gjitha akuzat. Raportet tregojnë se Aktor Group i ka paguar lobistit Marafatsos qindra mijëra dollarë me qëllim sigurimin e ndikimit pranë Departamentit të Shtetit, Departamentit të Energjisë dhe Shtëpisë së Bardhë. Kritikët argumentojnë se gjatë angazhimeve të saj zyrtare, Guilfoyle ka mbrojtur hapur interesat e kësaj korporate, duke ngritur shqetësime serioze për konflikte interesi dhe thyerje të rregullave të etikës shtetërore. Dëshmitë e stafit të brendshëm mbi sjelljen autoritare të diplomates, kërkesat e çuditshme për akull gjatë orëve të vona të natës dhe turnetë luksoze kanë rritur ndjeshëm trysninë ndaj trupës hetimore. Në një darkë të zhvilluar në Athinë, ajo thuhet se është mburrur hapur me peshën që SHBA-ja ushtron mbi vendimmarrjen e qeverive të huaja, duke përfshirë edhe Greqinë. Teksa demokratët e Kongresit po përgatisin seanca dëgjimore dhe vijojnë kërkesat për dosje financiare dhe shkëmbime elektronike, kjo ngjarje ka ndezur një debat të ashpër publik mbi standardet etike të diplomacisë amerikane dhe keqpërdorimin e mundshëm të funksioneve publike.