Tragjedi në Gjirokastër: Ndërron jetë në autoambulancë njëri nga të plagosurit e shpërthimit të fuqishëm

Ka ndërruar jetë Beqir Devolli, shtetasi që udhëtonte në automjetin e tipit “Mercedes-Benz”, i cili u përfshi nga një shpërthim i fuqishëm mbrëmjen e djeshme në afërsi të Drejtorisë Vendore të Policisë në Gjirokastër. Devolli ka ndërruar jetë gjatë orëve të para të këtij mëngjesi, ndërsa po transportohej me urgjencë drejt Spitalit të Traumës në Tiranë për të marrë ndihmë mjekësore më të specializuar, për shkak të plagëve të rënda. Ndërkohë, personi tjetër që ndodhej në të njëjtin mjet, Rigers Mela, fatmirësisht ndodhet jashtë rrezikut për jetën dhe po merr trajtimin e nevojshëm mjekësor. Autoritetet policore në Gjirokastër nuk kanë dalë ende me një komunikatë zyrtare lidhur me shkaqet e sakta të këtij incidenti, megjithëse pista kryesore mbetet ajo e shpërthimit nga lëndët eksplozive. Për të hedhur dritë mbi ngjarjen e rëndë që ka alarmuar banorët dhe kalimtarët e lagjes "18 Shtatori", gjatë orëve të mëngjesit në vendngjarje ka mbërritur një grup i posaçëm ekspertësh nga Tirana për të hetuar rrethanat e plota.