E diel me kushte të paqëndrueshme atmosferike: Ja si do të ndryshojë moti dhe ku priten reshje e shtrëngata

Për ditën e diel, territori i vendit tonë do të përfshihet nga një mot me paqëndrueshmëri atmosferike, ku mbizotëruese do të jenë vranësirat, të shoqëruara herë pas here me intervale me diell. Që në orët e para të mesnatës, reshjet e shiut do të bëhen të pranishme në pjesën më të madhe të vendit, me intensitet të ulët deri mesatar. Megjithatë, situata do të jetë më e theksuar në rajonet veriperëndimore dhe jugperëndimore, ku reshjet pritet të jenë me intensitet mesatar deri të lartë, të shoqëruara lokalisht me shtrëngata afatshkurtra, shkarkesa elektrike dhe breshër. Gjatë orëve në vijim të ditës, reshjet e shiut do të vazhdojnë të mbeten prezente me intensitet të ulët në nivel vendi, ndërsa në zonat e veriperëndimit dhe jugperëndimit ato do të ruajnë karakterin e herëpashershëm deri mesatar, duke u shfaqur në formën e rrebesheve të shkurtra bashkë me shkarkesa elektrike. Për sa i përket erës, ajo do të fryjë nga drejtimi i juglindjes dhe lindjes me një shpejtësi mesatare prej 5 metrash për sekondë. Megjithatë, përgjatë vijës bregdetare, në zonat luginore dhe ato malore, era do të fitojë forcë, duke arritur shpejtësi deri në 16 metra për sekondë, ndërsa në det do të gjenerohet një valëzim me forcë 3 deri në 4 ballë.