Saim Tahiraj arsyeton vendimin e LDK-së për Specialen: Qëndrim parimor për zbardhjen e vrasjeve politike

Veprimtari i Lidhjes Demokratike të Kosovës (LDK), Saim Tahiraj, ka dalë në mbrojtje të vendimit të partisë së tij për të mos mbështetur ndryshimet ligjore që lidhen me Gjykatën Speciale në Hagë, duke e cilësuar atë si një hap plotësisht të drejtë dhe në harmoni me parimet e këtij subjekti politik. Sipas tij, ky qëndrim reflekton nevojën jetike për të hedhur dritë mbi vrasjet me prapavijë politike të personaliteteve të shquara, oficerëve të karrierës, komandantëve dhe pjesëtarëve të policisë, të cilët shërbyen në institucionet e ngritura nga LDK-ja dhe aleatët e saj. “Vendimi i LDK-së për të mos e votuar ndryshimin e ligjit për Gjykatën Speciale në Hagë është i drejtë dhe në përputhje të plotë me zërin e anëtarësisë së saj. Shumë figura të rëndësishme politike të LDK-së, oficerë karriere, komandantë të luftës dhe oficerë policie, të cilët ishin pjesë e institucioneve shtetërore të themeluara nga LDK-ja, së bashku me partitë e tjera aleate, u vranë për motive politike. Shumica dërrmuese e këtyre vrasjeve mbetën të pazbardhura dhe askush nga sistemi i drejtësisë në Kosovë nuk pati guximin të hetonte e të merrej seriozisht me to,” u shpreh Tahiraj, duke shtuar se krijimi i Speciales ishte i pashmangshëm për të vendosur drejtësi ndaj viktimave të terrorit ideologjik. Duke iu referuar deklaratave të kryetarit Lumir Abdixhiku, Tahiraj theksoi se ato përkojnë plotësisht me vizionin dhe filozofinë politike të partisë. Ai gjithashtu vuri në pah se formacionet e tjera politike shqiptare mbajnë barrën e përgjegjësisë për ngjarjet e periudhës së luftës dhe pas saj, ndërsa vuri re se figura të fuqija nga këto rrethe janë tashmë pjesë e proceseve gjyqësore në Hagë. Në vlerësimin e tij, LDK-ja ka treguar pjekuri shtetërore dhe respekt ndaj partnerëve ndërkombëtarë, duke u distancuar nga përpjekjet populiste dhe protestat e organizuara për të bërë presion mbi drejtësinë ndërkombëtare. “Në këtë kontekst, organizimi i protestave dhe përpjekjet për të ushtruar presion populist mbi Gjykatën Speciale janë shqetësuese. Përmes këtyre veprimeve synohet the ndikohet në punën e një institucioni të drejtësisë dhe në rrjedhën e proceseve gjyqësore. Po ashtu, deputetët e këtyre partive votuan amendamentet për ndryshimin e ligjit të Gjykatës Speciale, duke ushtruar edhe një presion shtesë politik mbi këtë institucion. Qëndrimi i LDK-së ishte parimor dhe në interes të shtetit, duke respektuar marrëveshjet me miqtë tanë ndërkombëtarë,” shtoi ai. Në fund, Tahiraj ka komentuar edhe largimet e fundit nga radhët e LDK-së, duke i cilësuar sulmet ndaj partisë si të orientuara dhe si pjesë e një kursi të vjetër politik që nuk ka ndryshuar thelbësisht në qasjen e tij.