Tragjedi gjatë festivaleve tradicionale në Japoni: Dy viktima dhe 16 të plagosur pas përmbysjes së karrocave prej druri

Një ngjarje e rëndë ka tronditur festimet tradicionale Danjiri në prefekturën e Osakës, ku dy persona kanë gjetur vdekjen dhe 16 të tjerë kanë pësuar lëndime si pasojë e dy aksidenteve të njëpasnjëshme. Sipas raportimeve të medias vendase Asahi Shimbun, incidentet fatale ndodhën në qytetet Izumisano dhe Izumiotsu, pasi karroca gjigante prej druri u përmbysën gjatë manovrave në rrugë. Viktimat, të moshës 51 dhe 48 vjeç, ishin pjesëmarrës aktivë të festivalit në rolin e njohur si “takari”, ku përpiqeshin të mbanin nën kontroll ekuilibrin e strukturave të rënda gjatë kthesave. Ata humbën ekuilibrin dhe u shtypën tragjikisht nga vetë mjetet prej druri. Aksidenti i parë u shënua rreth orës 11:00 me orën lokale në qytetin Izumisano. Autoritetet bënë me dije se një karrocë u rrëzua në kryqëzimin Nagataki, duke zënë poshtë disa qytetarë. Ekipet e emergjencës nxorën nga gërmadhat një 51-vjeçar dhe e dërguan me urgjencë në spital, ku fatkeqësisht u konstatua vdekja e tij. Ndërkohë, shtatë persona të tjerë, të moshës nga 10 deri në 59 vjeç, kërkuar ndihmë mjekësore, ndërsa dy prej tyre paraqitën lëndime më të rënda. Vetëm dy orë më vonë, një tjetër tragjedi u regjistrua në qytetin Izumiotsu. Rreth orës 13:20, shërbimet e shpëtimit morën njoftimin për përmbysjen e një karroce në kryqëzimin Miyamachi. Një punëtor fabrike 48-vjeçar, me banim në Izumi, u shtyp për vdekje nga struktura masive prej druri. Për më tepër, nëntë persona të tjerë u transportuan në spital për trajtim mjekësor, me plagë që nuk paraqitnin rrezik për jetën. Të dyja ngjarjet ndodhën gjatë manovrës së rrezikshme të njohur si “yarimawashi”, ku pjesëmarrësit tentojnë të kthejnë me shpejtësi të lartë karrocat që peshojnë disa tonë në kënde të mprehta, pa humbur vrullin. Autoritetet policore kanë nisur hetimet për të zbardhur rrethanat e plota të ngjarjes, ku dyshimet paraprake tregojnë se mjetet humbën stabilitetin gjatë kthesave të papritura djathtas. Festimet Danjiri përbëjnë një traditë të njohur kulturore në Japoni, veçanërisht në rajonin e Osakës, ku banorët lokalë bashkohen për të drejtuar karroca të mëdha druri, të pajisura me gdhendje dhe stoli artistike. Këto struktura, që arrijnë pesha prej disa tonësh, tërhiqen përmes litarëve nga grupe të mëdha njerëzish nëpër rrugët urbane, të shoqëruara nga atmosfera festive e muzikës dhe brohoritjeve.