Tentoi të kalonte kufirin me armë dhe drogë në furgonin-kamper, pranga 51-vjeçares gjermane në Kakavijë

Një shtetase gjermane është vënë në pranga nga autoritetet kufitare në pikën e Kakavijës, pasi gjatë kontrollit të imtësishëm të automjetit dhe rulotit që ajo drejtonte janë zbuluar një armë zjarri dhe një sasi lënde narkotike. Ngjarja është regjistruar në vijën e dytë të kontrollit në dalje të vendit. Operacioni është finalizuar si rezultat i bashkëpunimit mes Policisë Kufitare, shërbimeve doganore dhe specialistëve të Seksionit për Hetimin e Narkotikëve në Drejtorinë Vendore të Policisë Gjirokastër. Mjeti u përzgjedh fillimisht për skanim dhe më pas iu nënshtrua një kontrolli të detajuar fizik. Gjatë kontrollit në kabinë dhe mjetin fjetës, efektivët e policisë gjetën një pistoletë me mulli bashkë me municion luftarak, si dhe gjashtë kavanoza e tri qese hermetike të mbushura me lëndë të dyshuar narkotike Cannabis Sativa, e cila pas peshimit rezultoi të ishte rreth 141 gramë. Pas përfundimit të veprimeve të para hetimore, drejtuesja e mjetit, 51-vjeçarja me inicialet A. S., u arrestua në flagrancë nga autoritetet kompetente. Si prova materiale, përveç armës së zjarrit, municionit dhe lëndës narkotike, janë sekuestruar gjithashtu automjeti së bashku me rulotin dhe një aparaturë celulare. Dokumentacioni procedural i rastit i ka kaluar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, ku e arrestuara do të përballet me akuzat për veprat penale të “Trafikimit të narkotikëve” dhe “Trafikimit të armëve dhe municioneve”. Hetimet për zbardhjen e plotë të kësaj ngjarjeje vijojnë.