Krim makabër në Gjilan, Besnik Tahiri: Dhuna dhe vrasjet nuk janë as nder e as traditë

Tragjedia e rëndë e ndodhur në fshatin Livoç të Ulët të Gjilanit, ku u vra një burrë dhe një grua, ka shkaktuar reagime të forta në skenën politike. Nënkryetari i Aleancës për Ardhmërinë e Kosovës, Besnik Tahiri, e ka cilësuar këtë ngjarje tragjike si një këmbanë alarmi për gjendjen alarmante të shoqërisë kosovare. Sipas Tahirit, aspiratat e shoqërisë sonë për t'u shfaqur si moderne dhe perëndimore bien poshtë në momentet e konflikteve, kur sipas tij, rikthehet një mentalitet i prapambetur që kërkon strehë te tradita dhe kanuni për të arsyetuar aktet e dhunës. “As tradita, as kanuni dhe as feja nuk mund ta justifikojnë vrasjen. Ka ardhur koha të flasim hapur, ta sfidojmë këtë mentalitet dhe të mos heshtim më. Dhuna nuk është nder, në veçanti vrasja e grave nuk është traditë, kurse heshtja nuk është zgjidhje”, ka theksuar ai në reagimin e tij publik. Në përmbyllje të reagimit, zyrtari i lartë i AAK-së ka bërë thirrje urgjente për një ballafaqim të drejtpërdrejtë me çdo mendësi që normalizon dhunën, duke kërkuar që heshtja të mos jetë më përgjigjja ndaj këtyre krimeve.