Debutimi i Laszlos te Vllaznia: Nuk jemi favoritë, por synojmë suksesin ndaj Dinamos

Trajneri i ri i Vllaznisë, Csaba Laszlo, ka dalë sot para mediave për të ndarë pritshmëritë e tij në prag të sfidës kundër Dinamos, e cila do të zhvillohet nesër në orën 18:30 në stadiumin “Loro Boriçi” dhe do të transmetohet drejtpërdrejt në ekranin e RTSH-së. Tekniku hungarez, i cili do të bëjë debutimin e tij zyrtar në krye të skuadrës shkodrane, ka konfirmuar se situata e tensionuar në klub tashmë i përket së kaluarës dhe se grupi është i fokusuar totalisht te tre pikët e kësaj ndeshjeje. “Çdo ndeshje është e rëndësishme. U përballëm me problemin, por u gjet zgjidhja. Dje kishte stërvitje. Problemet janë gjithmonë aty, më e rëndësishmja që të ketë zgjidhje. Ne patëm zgjidhje dhe klubi po ashtu. Ata u rikthyen në stërvitje dhe ne do të përballemi me një kundërshtar shumë të vështirë. Çdo kundërshtar është i vështirë, ne nuk jemi favoritët, por jo gjithmonë e fitojnë ndeshjen ata që janë favoritë”, u shpreh fillimisht trajneri. Duke folur rreth gjendjes psikologjike dhe mentalitetit që kërkon të instalojë te kuqeblutë, Laszlo theksoi rëndësinë e rezultateve pozitive për ngjitjen në renditje, ndërsa foli edhe për arsyet e pranimit të kësaj stoli. “Psikologjia më e mirë është nëse fiton në fund ndeshjen. Ne po përgatitemi të marrim pikë, të fitojmë çdo ndeshje, e di se nuk mund të fitojmë çdo ndeshje, por të marrim më të mirën dhe të rritemi në tabelën e klasifikimit. Vllaznia? Ndonjëherë merr vendime të pazakonta. Duhet të tregoj historinë për këtë klub. Erdha dhe takova presidentin, pata ndjesinë që është një njeri i sinqertë që do diçka më të mirë. I thashë: ‘Po, e bëjmë punën’. Shkova në shtëpi dhe i thashë gruas sime dhe po më pyeste si ju. I thashë: ‘Është thjesht një ndjesi dhe vendosa. Do e bëj deri në fund të sezonit dhe dua ta shoh këtë klub që të mos bie nga kategoria. Kam besimin që do arrijmë objektivat”, deklaroi ai. Në aspektin teknik, ai vuri në dukje se koha mbetet pengesa më e madhe për të përshtatur skuadrën me skemat e reja, ndërsa theksoi se stabilizimi i prapavijës ka qenë prioriteti kryesor i tij që prej marrjes së detyrës. “Kundërshtari më i madh për momentin është koha. Nëse bën ndryshime, duhet që lojtarët të kuptojnë në mënyrën e duhur. Kemi bërë ndryshime dhe nga ana taktike, por edhe personale. Objektivi ynë kryesor ishte që të stabilizohej mbrojtja”, shtoi tekniku. Në mbyllje të konferencës, trajneri i Vllaznisë nuk fshehu ambicien për fitore, pavarësisht pozicionit aktual në tabelë, duke pranuar gjithashtu se rrjedha e lojës mund të diktojë edhe vlerësime të tjera në fund të 90 minutave. “Çdo pikë na ndihmon. Por të jem i sinqertë, ndeshje në shtëpi dhe derbi pavarësisht se jemi në vend të fundit, për mua kryesore është fitorja. Këtë dua. Se si do të shkojë loja, duhet të reagojmë. Ndoshta në fund të ndeshjes mund të say se jam i lumtur me 1 pikë, por në krahun tjetër shkojmë vetëm për fitoren. Po ashtu edhe ekipi kundërshtar do mendojë të njëjtën gjë”, përfundoi Laszlo.