KOK përfaqësohet në Split: Përgatitjet për ngjarjet e mëdha sportive dhe Lojërat Olimpike 2028 në fokus të seminarit evropian

Komiteti Olimpik i Kosovës (KOK) ka qenë pjesë e rëndësishme e seminarit të 46-të të Komiteteve Olimpike Evropiane (EOC) dhe Forumit për Solidaritetin Olimpik, ngjarje kjo e cila u organizua në qytetin e Splitit, në Kroaci. Ngjarja mblodhi krerët e sportit evropian, ndërsa delegacioni i Kosovës u përfaqësua nga nënpresidenti i KOK-ut, Milaim Kelmendi, dhe sekretari i përgjithshëm, Besim Aliti. Gjatë punimeve të këtij seminari u shqyrtua agjenda dhe ecuria e përgatitjeve për aktivitete të rëndësishme ndërkombëtare të parapara për vitin 2027. Në këtë kuadër u trajtuan sfidat dhe organizimi për Lojërat Evropiane Stamboll 2027, Festivalin Olimpik Dimëror Evropian për të Rinj (EYOF) në Brasov, si dhe edicionin veror të EYOF-it në Lignano Sabbiadoro. Për këtë të fundit, roli i delegatit nga Kosova ishte qendror; sekretari Besim Aliti, në cilësinë e kryesuesit të Komisionit Koordinues të EOC-ut, bëri një paraqitje të detajuar të hapave dhe progresit të arritur deri më tani. Sfidat dhe organizimi për Lojërat Olimpike Los Angeles 2028 përbënë një tjetër pikë kyçe të diskutimeve. Përfaqësuesit e Komitetit Organizativ njoftuan të pranishmit lidhur me aspektet logjistike, duke përfshirë planet për transportin, akomodimin, Fshatin Olimpik dhe detaje të tjera thelbësore për mbarëvajtjen e garave. Gjatë mbrëmjes gala, e cila u organizua në kuadër të këtij takimi, u nda edhe çmimi prestigjioz për sportistin më të mirë të ri evropian për vitin 2026, çmim ky që i takoi snowboardistit nga Ukraina, Dmytro Luchkin. Pjesëmarrja në këtë ngjarje i mundësoi drejtuesve të KOK-ut që të zhvillojnë takime dypalëshe me figura të shquara të Lëvizjes Olimpike ndërkombëtare. Këto kontakte shërbyen për shkëmbimin e eksperiencave dhe për hapjen e dyerve të reja të bashkëpunimit institucional. Samitet e këtij niveli mbeten një mekanizëm i pazëvendësueshëm për harmonizimin e hapave drejt sfidave të ardhshme sportive dhe për ngritjen e bashkëpunimit mes vendeve anëtare të familjes olimpike evropiane.