Tabaku lëshon alarmin për pasuritë publike: Po miratohen ligje klienteliste që tjetërsojnë pronat e qytetarëve

Deputetja e Partisë Demokratike, Jorida Tabaku, ka ngritur alarmin mbi keqmenaxhimin e pronave publike nga ana e qeverisë, duke vënë theksin te mungesa e transparencës për marrëveshjet e zhvillimit dhe përfitimet reale që arkëton shteti. Ajo ka denoncuar atë që e cilësojë si ligje të përshtatura për interesat e rrethit të ngushtë të pushtetit. Në fokus të deklaratës së saj ka qenë Korporata e Investimeve Shqiptare, një shoqëri shtetërore e cila, sipas saj, ka fuqinë e madhe për të marrë nën administrim pasuri publike nga institucionet qendrore dhe vendore për t'ia kaluar më pas projekteve të investimit. Tabaku kërkon llogaridhënie të plotë për çdo fazë të procesit, nga vlerësimi financiar e deri te përzgjedhja e partnerëve privatë. Duke iu referuar gjetjeve zyrtare të Kontrollit të Lartë të Shtetit, deputetja e opozitës bëri të theksuar se auditimi i kësaj korporate ka nxjerrë në pah mangësi serioze në planifikim, mungesë të metodologjive të qarta për projektet, si dhe analiza të çalësishme të rreziqeve dhe përfitimeve, duke lënë pas 27 rekomandime të lëna në harresë nga ekzekutivi. Sipas Tabakut, qytetarët nuk mund të vazhdojnë t'i besojnë verbërisht pushtetit kur bëhet fjalë për tokën publike dhe hapësirat e përbashkëta mes pallateve, të cilat kanë një vlerë të jashtëzakonshme financiare dhe sociale. Ajo i bëri thirrje direkte kryeministrit që t'i bëjë publike të gjitha marrëveshjet, duke shfaqur shifra konkrete se çfarë fiton publiku nga këto transaksione. Në përmbyllje të prononcimit të saj, ajo solli në vëmendje rastin e pronës së Shtëpisë së Fëmijës “Zyber Halluli” në Tiranë, duke e cilësuar si një pasuri me vlerë të lartë dhe me rëndësi parësore për komunitetin, e cila tashmë ndodhet në qendër të pikpyetjeve të mëdha mbi mënyrën se si po menaxhohet nga strukturat shtetërore.