E jashtëzakonshme për Shqipëri-Finlandë: Shiten 10 mijë biletat e para një muaj para ndeshjes

Interesi për kombëtaren kuqezi vijon të jetë në nivele të larta, ndërsa tashmë janë shitur afërsisht gjysma e biletave për sfidën e radhës ndaj Finlandës, e cila do të zhvillohet pas një muaji, më 15 nëntor. Me 10 mijë bileta të blera deri më tani, ose rreth 50% të kapacitetit total të stadiumit, tifozët kanë dhënë një sinjal të qartë se mbështetja për skuadrën nuk varet më nga emri i kundërshtarit. Kjo përballje ka një rëndësi parësore për kuqezinjtë, të cilët synojnë me çdo kusht kreun e renditjes. Në një duel ku çdo detaj ka peshën e tij, prania masive e publikut në shkallët e stadiumit do të përbëjë një mbështetje shtesë për ekipin. Fanella e Kombëtares mbart një domethënie shumë më të madhe se vetë rezultatet apo kundërshtarët në fushë, duke u shndërruar në simbol krenarie dhe bashkimi për mbarë opinionin sportiv. Dikur, shtëpitë e futbollit gumëzhinin vetëm ndaj ekipeve elitare si Gjermania, Anglia, Italia apo Holanda. Megjithatë, mentaliteti i tifozërisë ka ndryshuar rrënjësisht, pasi dashuria për Shqipërinë tashmë nuk kushtëzohet nga rivali që ka përballë. Kështu, mesazhi për sfidën Shqipëri-Finlandë është dhënë që herët: lojtari i dymbëdhjetë do të jetë aty për të mbështetur skuadrën në çdo moment të ndeshjes.