Sakrifica e Ambasadores Elvana Shala: Udhëtimi drejt Nepalit në karrocë pas një ndërhyrjeje të vështirë kirurgjikale

Ambasadorja e Vullnetit të Mirë për Kosovën, Elvana Shala, ka sjellë në vëmendje sfidat e fshehura të misionit të saj gjatë një rrëfimi të hapur në emisionin “Weekend”, duke treguar anën e panjohur të angazhimeve dhe udhëtimeve ndërkombëtare. Ajo ka shpjeguar se pas imazhit publik dhe aktiviteteve të saj fshihen momente të rënda, ku i është dashur të përballet me sfida të mëdha shëndetësore dhe të vazhdojë rrugëtimin e saj pavarësisht vuajtjeve fizike. “Ka pasur momente që Elvana ka shkuar me dhimbje fizike të jashtëzakonshme në një udhëtim dhe që publiku nuk e ka ditë”, është shprehur ajo gjatë intervistës. Një nga episodeve më prekëse dhe më sfiduese të karrierës së saj mbetet udhëtimi drejt Nepalit. Ajo zbuloi se këtë vizitë e ka realizuar e ulur në karrocë, pasi kishte kaluar vetëm pak kohë nga një operacion jashtëzakonisht i rëndë. “Ka pasë momente që Elvana ka shkuar drejt Nepalit me përdorim të karrocës për shkak se sapo i isha nënshtruar një operimi tejet të rëndë në jetën time, as këtë pjesë publiku nuk e ka ditë”, tregoi Shala. Gjatë rrëfimit të saj, ajo ndau me shikuesit edhe aspekte të tjera të vështirësive personale dhe profesionale me të cilat është ndeshur përgjatë rrugëtimit të saj humanitar.