Skandal në basketbollin kosovar: Gjyqtarët sulmohen fizikisht pas ndeshjes, paralajmërohet bojkot masiv

Komuniteti i basketbollit në Kosovë është tronditur thellë nga një incident i dhunshëm që ka ndodhur në fundjavën e kaluar, menjëherë pas përfundimit të përballjes ndërmjet Sigal Prishtinës dhe Golden Eagle Yllit. Në këtë ngjarje të rëndë, tre gjyqtarë dhe delegati i sfidës kanë rënë pre e një sulmi brutal fizik, duke ngritur alarmin për sigurinë e zyrtarëve sportivë. Agresioni ka ndodhur jashtë hapësirave të Pallatit të Rinisë në kryeqytet, ku një grup prej rreth 15 personash u ka zënë pritë zyrtarëve teksa po drejtoheshin drejt automjeteve të tyre, duke i goditur ata fizikisht. Elvira Dushku, sekretare e përgjithshme e Federatës së Basketbollit të Kosovës, ka konfirmuar se rasti është denoncuar zyrtarisht dhe tashmë po trajtohet nga Policia e Kosovës. “Pas ndeshjes Sigal Prishtina ndaj KB Golden Eagle Ylli, të xhiros së fundit, të dielën, gjyqtarët na kanë lajmëruar se me të dalë nga palestra pas ndeshjes, ata janë sulmuar nga një grup prej 10-15 personave dhe se e kanë identifikuar njërin prej tyre, ndërsa të tjerët kanë thënë se ishin tifozë të klubit të Prishtinës, që janë sulmuar e goditur nga këta persona, kanë ikur dhe janë shpërndarë. Pastaj janë bërë bashkë edhe kanë shkuar në polici për të raportuar rastin. Së bashku, tre gjyqtarët edhe delegati i ndeshjes”, ka deklaruar Dushku. Situata bëhet edhe më alarmante për shkak se njëri nga sulmuesit e dyshuar është zyrtarisht anëtar i bordit të klubit bardhekaltër, fakt ky i konfirmuar gjithashtu nga zyrtarja e lartë e federatës. “Po, është anëtar i bordit. Është cekur nga personat e sulmuar me emër dhe mbiemër, është identifikuar, dhe kemi kërkuar listën e anëtarëve të bordit të Prishtinës dhe ai është aty. Komisioni Disiplinor ka marrë të gjitha deklaratat, ka kërkuar nga policia pamje, dhe besoj se shumë shpejt do të del me vendim edhe ndaj personit dhe organizatës sportive për dështim të organizimit dhe sulm ndaj zyrtarëve”, ka theksuar ajo. Detaje shtesë rreth këtij akti të shëmtuar ka ndarë edhe kryetari i Shoqatës së Gjyqtarëve të Basketbollit, Elldin Uglari. “Gjyqtarët kanë pasur presion gjatë ndeshjes prej parketit, ajo është bërë normale. Por pas përfundimit të ndeshjes, një grup i caktuar, tifo-grup i Prishtinës, në mënyrë të organizuar, në momentin që gjyqtarët dhe delegati kanë dalë prej Pallatit të Rinisë, duke shkuar te vetura u kanë zënë pritën dhe i kanë sulmuar fizikisht. Kjo nuk është aspak e mirë dhe ka ndikuar emocionalisht te gjyqtarët”, ka shpjeguar Uglari. Në shenjë pakënaqësie dhe revolte ndaj mungesës së mbrojtjes, kreu i Shoqatës së Gjyqtarëve ka paralajmëruar ndërprerjen e shërbimeve nëse institucionet nuk ofrojnë garanci konkrete për sigurinë e tyre. “Shpresoj që do të merren masa shumë të rënda, që ne të kemi siguri në fushë dhe jashtë saj. Kur ne nuk e ndjejmë veten të sigurt, nuk pranojmë të dalim në fushë. Prej kësaj jave kemi kërkuar nga Federata dhe Policia të na ofrojnë siguri maksimale. Kemi biseduar me kryetarin dhe sekretaren, janë shumë të shqetësuar. Në momentin që nuk ofrohen kushtet e sigurisë për gjyqtarët e basketbollit, ne nuk do të pranojmë të vazhdojmë të gjykojmë ndeshje”, ka thënë Uglari. Sa i përket masave ndëshkimore, rregulloret e brendshme parashohin sanksione të rënda si për klubin ashtu edhe për individët e përfshirë në dhunë. “Konform akteve normative, për raste të tilla mund të shkojë një deri në tetë ndeshje pa shikues, ose një deri në tetë ndeshje në terren neutral. Ndërsa për personin në fjalë, nëse është hera e parë atëherë një deri në tri vjet përjashtim, nëse është recidivist, atëherë përjetë. Aktet normative të federatës janë shumë të fuqishme dhe mbrojnë të gjithë aktorët”, ka bërë të ditur Dushku. Duke e cilësuar këtë sulm si një goditje të rëndë ndaj vetë themeleve të sportit, nga strukturat përgjegjëse është përcjellë një mesazh i prerë për të gjitha klubet: pa gjyqtarë në parket, nuk mund të ketë garë.