Kryeministri hungarez i dërgon urime Kurtit, premton mbështetje të palëkundur për sigurinë dhe rrugën evropiane të Kosovës

Kryeministri i Republikës së Kosovës, Albin Kurti, ka pranuar një letër urimi nga homologu i tij hungarez, Péter Magyar, me rastin e marrjes së mandatit të ri qeverisës. Dorëzimi i këtij mesazhi u bë i mundur përmes ndërmjetësimit të ambasadorit László István Dux. Në mesazhin e tij urues, kreu i ekzekutivit hungarez ka vlerësuar lart rëndësinë e vendit tonë në arenën rajonale. "Dua t'ju shpreh urimet më të sinqerta për zgjedhjen tuaj Kryeministër i Republikës së Kosovës. Ne njohim rolin kyç të Kosovës në stabilitetin e rajonit të Ballkanit Perëndimor. Andaj, jemi të bindur që një Ballkan Perëndimor prosperues ka rëndësi jetike për Hungarinë dhe mbarë kontinentin evropian", thuhet ndër të tjera në letrën e urimit. Po ashtu, gjatë këtij komunikimi zyrtar, shefi i qeverisë hungareze ka ritheksuar gatishmërinë e shtetit të tij për të qëndruar pranë institucioneve të Kosovës, si në aspektin e mbrojtjes ashtu edhe në proceset eurointegruese. "Në këtë frymë, më lejoni të ritheksoj se Hungaria mbetet e përkushtuar për të kontribuuar për sigurinë e Kosovës nëpërmjet pjesëmarrjes në misionin e KFOR-it dhe për të mbështetur vendin tuaj në rrugën evropiane", ka përfunduar kryeministri Magyar në letrën e tij drejtuar kreut të Qeverisë së Kosovës.