Votuan pro pavarësisht kritikave për reformën, Korreshi lëshon akuza të forta ndaj Braçes dhe Spiropalit

Deputeti i Partisë Demokratike, Saimir Korreshi, ka hedhur akuza të forta ndaj kolegëve të tij socialistë, Erion Braçe dhe Elisa Spiropali, të cilët megjithëse ngritën shqetësime dhe kritika ndaj reformës territoriale, në momentin e votimit në Kuvend u rreshtuan pro saj. I ftuar në emisionin “News24 Fundjavë” me moderatoren Megi Latifi, ligjvënësi demokrat u shpreh se një nismë e tillë prek në mënyrë të drejtpërdrejtë përditshmërinë e qytetarëve në bashkitë që pritet të riorganizohen. Sipas tij, përfaqësuesit e mazhorancës duhet të ishin treguar më të përmbajtur dhe të kishin shmangur qëndrimet kritike publike, nëse në fund do të votonin dakordësisht me linjën e partisë. Duke sjellë në vëmendje dinamikat e brendshme politike, Korreshi theksoi se pavarësisht diskutimeve që mund të lindin brenda grupeve parlamentare, kur bëhet fjalë për vendime madhore që ndryshojnë jetën e banorëve, skenarët duhet të jenë më të qartë dhe pa dyftyrësi. "Më së paku, duhej të na kursenin përrallat me mbret, pasi kur njeriu është i shantazhuar, vepron kundër. Por duhej të na hiqnin këtë pjesën ku bëjnë diskurs. Ndaj, më mirë hesht, rri aty, ul kokën dhe voto pro. Mos i bëj njerëzit që të shpresojnë. Jam politikan, kundërshtari i tyre, do të më vinte më mbarë të them se ata janë të shantazhueshëm," u shpreh Korreshi gjatë intervistës.