Jeta e luksit pas hekurave të Sean 'Diddy' Combs: Si i kushtoi shtrenjtë posedimi i celularit dhe shërbimet e veçanta

Pije ekskluzive, masazhe relaksuese, ushqime të përgatitura posaçërisht, një celular i ndaluar dhe të burgosur të tjerë që kujdeseshin për çdo detaj, nga gatimi deri te pastrimi i tualetit. Kjo ishte rutina e paprecedentë e Sean “Diddy” Combs brenda qelisë, sipas një investigimi të thelluar të publikuar nga NBC News. Megjithatë, këto lehtësira të paligjshme i kanë kushtuar shtrenjtë 56-vjeçarit të njohur të industrisë muzikore, duke e detyruar atë të përballet me pasojat e rënda disiplinore të vendosura nga autoritetet. Trupat korrigjuese në burgun federal në Fort Dix, New Jersey, ndërmorën masa drastike ndaj producentit, duke i hequr 41 ditë nga periudha e reduktimit të dënimit për shkak të sjelljes së mirë. Ky ndëshkim ka shtyrë datën e tij të lirimit nga janari në mars të vitit 2028, pas zbulimeve tronditëse mbi stilin e tij të jetesës prapa hekurave. Sipas informacioneve të bëra publike, autoritetet e burgut e ndëshkuan Combs për veprime që cenojnë rëndë sigurinë dhe rendin e brendshëm të institucionit. Jose Rojas, sekretar i sindikatës AFGE Local 506, theksoi se heqja e 41 ditëve të llogaritura për sjellje të mirë përbën një nga masat më të ashpra disiplinore që mund të merren ndaj një të dënuari. Ai sqaroi se një ndëshkim i tillë aplikohet zakonisht kur brenda mjediseve të burgut zbulohen pajisje të paligjshme komunikimi. Përdorimi i telefonave celularë trajtohet me zero tolerancë, pasi, siç u shpreh ai, një i burgosur mund të koordinojë lehtësisht edhe sulme të ndryshme nga brenda qelisë. Në rastin konkret të Diddy-t, raportimet tregojnë se ai kishte siguruar qasje në një celular, të cilin e shfrytëzonte ndër të tjera edhe për të shikuar fotografi intime dhe me përmbajtje seksuale të dërguara nga ish-partnerja e tij. Megjithatë, institucioni nuk ka lëshuar ndonjë deklaratë zyrtare që konfirmon nëse ky përdorim specifik ka qenë shkaku kryesor i masës ndëshkimore. Me ndryshimin e fundit, data e re e lirimit të producentit është caktuar zyrtarisht për 2 mars 2028, duke zëvendësuar planifikimin e mëparshëm të datës 21 janar 2028. Skandali nisi të merrte dhenë në fund të muajit shtator, kur NBC News hodhi dritë mbi kushtet skandaloze të mbajtjes në paraburgim të ish-manjatit të muzikës amerikane. Katër të burgosur që ndanin të njëjtin bllok me Combs dëshmuan për një përditshmëri që nuk kishte asgjë të përbashkët me realitetin e zakonshëm të të burgosurve të tjerë. Sipas të njëjtave burime, Diddy shpenzonte shuma marramendëse çdo muaj për të siguruar shërbime dhe privilegje të veçanta. Disa prej të burgosurve angazhoheshin për t'i gatuar vakte të personalizuara, si pica, empanadas apo pulë me kari, ndërsa të tjerë i rregullonin krevatin, kujdeseshin për korrespondencën apo i lanin rrobat. Dëshmitë shkuan edhe më larg, duke zbuluar se ekzistonte një i burgosur i caktuar vetëm për të pastruar dhe dezinfektuar tualetin dhe dushin përpara se producenti t'i përdorte ato. Për më tepër, Combs thuhet se shijonte masazhe të stilit kinez dhe kishte furnizim të rregulluar me pije alkoolike, përfshirë edhe konjakun e njohur Hennessy, pavarësisht rregullave të rrepta të burgut. “Këto nuk janë gjëra normale që i sheh në burg. Këto janë luks i njerëzve të pasur,” u shpreh një prej të burgosurve për median në fjalë. “Tingëllon si diçka e pabesueshme, por nga ana tjetër, ky është Diddy,” shtoi ai.