Partia Demokratike e Kosovës mbush 27 vjet nga themelimi: Rrugëtimi politik dhe drejtuesit ndër vite

Sot shënohet 27-vjetori i themelimit të Partisë Demokratike të Kosovës (PDK), e cila konsiderohet si një nga forcat më me ndikim në skenën politike të vendit. Kjo parti i vu bazat e saj më 10 tetor 1999, duke pasur si drejtues të parë ish-presidentin e Kosovës, Hashim Thaçi. Ai e udhëhoqi këtë subjekt për gati dy dekada, deri në vitin 2016, moment kur u largua nga postet partiake pas marrjes së detyrës si kreu i shtetit. Pas largimit të Thaçit, drejtimin e PDK-së e mori Kadri Veseli, i cili qëndroi në krye të partisë deri në nëntor të vitit 2020. Më pas, Enver Hoxhaj ushtroi funksionin e kryetarit në detyrë deri në korrik të vitit 2021, kur në krye të këtij subjekti u zgjodh Memli Krasniqi. Pas dorëheqjes së Krasniqit, më 17 nëntor 2025, në krye të partisë u zgjodh drejtuesi i saj aktual, Bedri Hamza. PDK-ja u bë pjesë përbërëse e qeverisjes së vendit pas zgjedhjeve parlamentare të vitit 2001. Nga radhët e këtij subjekti, Bajram Rexhepi mori postin e kryeministrit më 4 mars 2002, detyrë të cilën e ushtroi deri në dhjetor të vitit 2004. Në zgjedhjet parlamentare të 17 nëntorit 2007, kjo parti arriti të renditej e para në nivel vendi, ku më pas, në vitin 2008, Hashim Thaçi mori drejtimin e ekzekutivit të Kosovës. Ndërkaq, në zgjedhjet e parakohshme parlamentare të mbajtura më 28 dhjetor 2025, PDK-ja u rendit si forca e dytë politike, duke grumbulluar 20.19 për qind të votave dhe duke siguruar 22 ulëse në Kuvendin e Kosovës.