Nju-Jork: Agjentët e ICE qëllojnë me armë një person brenda automjetit në sy të djalit të tij 5-vjeçar

Një incident i rëndë ka tronditur lagjen Marble Hill në Nju-Jork, ku agjentët amerikanë të emigracionit kanë plagosur me armë zjarri një burrë në brendësi të makinës së tij, ndërkohë që në automjet ndodhej edhe një fëmijë i mitur. Ngjarja është konfirmuar zyrtarisht nga autoritetet vendase, përfshirë kryetarin e bashkisë, policinë e qytetit dhe dëshmitarët okularë. Statistikat tregojnë se që nga rikthimi në detyrë i presidentit republikan Donald Trump, agjentët federalë të imigracionit kanë qëlluar të paktën 21 persona, prej të cilëve 7 kanë ndërruar jetë, duke shkaktuar valë protestash në mbarë Shtetet e Bashkuara. Sipas kritikëve, politika e ashpër e Trumpit për intensifikimin e dëbimeve ka sjellë një rritje të ndjeshme të përplasjeve të dhunshme. Ata akuzojnë gjithashtu administratën se po lejon pandëshkueshmërinë, duke mos mbajtur përgjegjës agjentët e përfshirë në këto ngjarje. Në krahun tjetër, presidenti Trump ka mbrojtur vendimet e tij, duke theksuar se një numër i madh emigrantësh duhet të largohen nga vendi. Ai i ka fajësuar ata shpesh në mënyrë të përgjithshme për mashtrime financiare dhe përfshirje në krime të dhunshme. Zohran Mamdani, anëtar i Këshillit Bashkiak të Nju-Jorkut, ka shprehur shqetësimin e tij të thellë përmes një deklarate. “Raportet fillestare tregojnë se agjentët rrethuan (burrin) dhe një fëmijë 5-vjeçar në makinën e tij, përpara se të qëllonin disa herë,” u shpreh ai. Në një konferencë për shtyp të mbajtur vonë në mbrëmje, Mamdani shtoi se ka biseduar në telefon me Presidentin Trump dhe Sekretarin e Sigurisë së Brendshme, Mullin, për të negociuar lirimin e personit të plagosur nga agjentët e ICE-s. Megjithatë, sipas tij, këto negociata dështuan, ndërsa i ka bërë thirrje administratës Trump që të ndalojë menjëherë operacionet e ICE-s në qytetin e Nju-Jorkut. “Këto veprime po e bëjnë qytetin më pak të sigurt,” u shpreh ai, duke shtuar se banorët duan largimin e ICE-s nga rrugët, shkollat, spitalet dhe nga prania e fëmijëve. Komisionerja e Policisë së Nju-Jorkut, Jessica Tisch, bëri të ditur se fëmija 5-vjeçar nuk ka pësuar lëndime fizike dhe se pas verifikimeve të nevojshme, është vendosur nën kujdesin e një familjari. Nga ana e tij, Departamenti i Sigurisë Kombëtare (DHS), si agjenci mëmë e ICE-s, sqaroi se efektivët po zhvillonin një “operacion të synuar zbatimi të ligjit” në zonën Bronx të Nju-Jorkut. Qëllimi i operacionit ishte arrestimi i një shtetasi 28-vjeçar nga Republika Dominikane, i cili kishte një dënim të mëparshëm penal. Sipas komisioneres Tisch, personi në fjalë ishte arrestuar dy herë në qytetin e Nju-Jorkut gjatë viteve 2023 dhe 2025. “Gjatë incidentit, një oficer i ICE-s qëlloi me armë dhe imigranti i paligjshëm me precedentë penalë mbeti i plagosur,” thuhet në nomimin e DHS, ku theksohet gjithashtu se agjentët i kanë dhënë menjëherë ndihmën e parë. “Individi është gjallë dhe ndodhet në një spital lokal,” përfundon njoftimi i autoriteteve.