Skandali te Portugalia: Cristiano Ronaldo rrezikon pezullim gjashtëmujor pas largimit nga kombëtarja

Ylli portugez Cristiano Ronaldo po ballafaqohet me mundësinë e një dënimi prej gjashtë muajsh mosaktivizim dhe gjobë financiare, pas largimit të tij të bujshëm nga kampi stërvitor i Përfaqësueses së Portugalisë. Sulmuesi 41-vjeçar vendosi të lëshojë grumbullimin e ekipit kombëtar, pasi u la në stol gjatë të gjithë sfidës kundër Norvegjisë, pa mundur të regjistrojë asnjë minutë lojë në fushë. Vendimi për ta lënë rezervë erdhi nga trajneri Jorge Jesus – i cili më parë e ka drejtuar atë te Al-Nassr – pavarësisht premtimit paraprak se lojtari do të ishte pjesë e formacionit. Kjo shënoi një precedent të pazakontë, pasi ishte hera e parë në dy dekadat e fundit që Ronaldo grumbullohet, por nuk aktivizohet në një ndeshje zyrtare. Tensioni u përshkallëzua menjëherë, ndërsa motra e futbollistit, Elma Aveiro, reagoi publikisht duke kërkuar më shumë dinjitet dhe respekt për vëllain e saj. Si pasojë e këtij largimi të menjëhershëm, fituesi i pesë Topave të Artë rrezikon seriozisht sanksione disiplinore nga shtëpia e futbollit portugez. Sipas burimeve pranë mediave ndërkombëtare dhe dispozitave të Federatës Portugeze të Futbollit, Kodi Disiplinor parashikon masa të rrepta për çdo lojtar që braktis pa arsye zyrtare aktivitetet apo ndeshjet e përfaqësueses. Rregullorja përcakton qartë se çdo futbollist i thirrur rregullisht që largohet ose nuk paraqitet në seanca stërvitore, ndeshje apo angazhime zyrtare të kombëtares, ndëshkohet me pezullim nga një deri në gjashtë muaj, si dhe me gjobë monetare që varion nga 500 deri në 1.000 euro për lojtarët profesionistë. Duke pasur parasysh të ardhurat e larta të Ronaldos, ku llogaritet se fiton rreth 488 mijë funte në ditë, sanksioni financiar nuk pritet të përbëjë ndonjë sfidë për të, por dënimi sportiv mbetet një çështje shqetësuese. Nga ana e tij, ish-sulmuesi i Manchester United është shprehur se do të zbulojë të vërtetën e plotë rreth kësaj ngjarjeje në momentin e duhur, duke zgjedhur të heshtur tani për tani për të mos prishur atmosferën dhe përqendrimin e bashkëlojtëtarëve para duelit të sonte kundër Danimarkës.