Qëndrim i prerë nga Sofja: Korniza e vitit 2022 me Shkupin mbetet e patjetërsueshme

Zyrtarja e lartë e diplomacisë bullgare, Velisllava Petrova Çamova, ka përsëritur prerazi se shteti i saj kundërshton çdo ide për ndryshime kushtetuese me hyrje në fuqi të shtyrë dhe refuzon çdo mundësi për rinegociim të kushteve të dakorduara gjatë vitit 2022 me Maqedoninë e Veriut. Ky qëndrim u rikonfirmua para ligjvënësve në Kuvendin e Bullgarisë, vetëm një ditë pas bisedimeve ballë për ballë në Sofje me ministrin e Jashtëm maqedonas, Timço Mucunski. Sipas kryediplomates Petrova Çamova, kërkesat e palës bullgare ndaj Shkupit mbeten të panegociueshme dhe përfshijnë dy pika kryesore: garantimin e të drejtave të pakicës bullgare dhe përfshirjen e tyre formale në Kushtetutë. “A kemi arritur marrëveshje për ndryshime kushtetuese me zbatim të prolonguar? Përgjigja është “jo”. Ministria e Punëve të Jashtme qëndron pas marrëveshjes së vitit 2022 dhe kategorikisht hedhim poshtë mundësinë e çfarëdo anashkalimi, rinegociimi, dakordësie me vende të caktuara anëtare për çfarëdo lloj dakordësie që do të ndryshonin kushtet e marrëveshjes së arritur. Bullgaria nuk merr pjesë në rinegociimin e marrëveshjes me Shkupin. Nuk kemi nevojë për rinegociim dhe rimarrëveshje sepse ata janë të papranueshme për ne”, deklaroi Velisllava Petrova Çamova, Ministre e Jashtme e Bullgarisë. Dy ministrat zhvilluan një takim dypalësh në kryeqytetin bullgar, në kuadër të zhvillimeve anësore të Konferencës për Korridorin 8. Ndërsa ministri Timço Mucunski e cilësoi takimin si konstruktiv dhe të zhvilluar në një atmosferë pozitive, ai vuri në dukje se pozicionet e të dyja shteteve vazhdojnë të jenë mjaft larg njëra-tjetrës. Ai gjithashtu theksoi se lidhur me procesin e integrimit evropian mbizotëron një shkallë e lartë mosbesimi, e cila, sipas tij, ndërlidhet drejtpërdrejt me mungesën e parashikueshmërisë dhe përvojën negative nga kushtëzimet dypalëshe në të kaluarën. Ngjarja ka marrë vëmendje të gjerë edhe në hapësirën mediatike bullgare. Pavarësisht se toni i takimit u cilësua miqësor, mediumet kryesore në vend kanë vënë theksin te fakti se palët nuk kanë lëvizur aspak nga pozicionet e tyre dhe se kushtet e vendosura nga Sofja për rrugëtimin evropian të Shkupit mbeten plotësisht në fuqi.