Ngjarje e pazakontë në Kroaci: E moshuara 80-vjeçare gërvisht me çelës pesë vetura në Zagreb

Autoritetet policore në Zagreb kanë përmbyllur hetimet lidhur me një rast të pazakontë vandalizmi, ku protagonistë është bërë një grua e moshës 80-vjeçare, e cila dyshohet se ka dëmtuar pesë automjete të parkuara në zonën e Susedgradit duke përdorur një çelës. Sipas njoftimit zyrtar nga Drejtoria e Policisë së Zagrebit, e moshuara ngarkohet penalisht për pesë vepra penale të dëmtimit të pasurisë së huaj, veprime të cilat kanë prekur drejtpërdrejt tre qytetarë dhe dy subjekte private. Sipas hetimeve paraprake, incidentet kanë ndodhur në dy periudha të ndryshme kohore, konkretisht mes datave 3-4 tetor dhe gjatë natës 6-7 tetor, kohë gjatë së cilës ajo u është afruar automjeteve duke i gërvishtur qëllimisht me mjetin e fortë që mbante me vete. Më 3 dhe 4 tetor, në rrugën "Donje Vrapçe", ajo ka dëmtuar një automjet tip Volkswagen Golf në pronësi të një 47-vjeçari, ndërsa në rrugën "Ivana Brliq Mazhuraniq" shënjestra e saj kanë qenë dy automjete të tjera, një Volkswagen Polo dhe një Opel, që të dyja në pronësi të kompanive të ndryshme. Seria e dëmtimeve ka vijuar edhe gjatë natës së 6-7 tetorit, kur e moshuara është kthyer sërish në rrugën "Donje Vrapçe". Atje, ajo ka dëmtuar sërish të njëjtin model Volkswagen Golf, për të vazhduar më pas me një veturë Kia të një 28-vjeçari dhe një BMW në pronësi të një gruaje 52-vjeçare. Pas dokumentimit të plotë të rrethanave, e pandehura 80-vjeçare është dërguar te mbikëqyrësi i paraburgimit, ndërkohë që procedurat e mëtejshme ligjore dhe hetimi penal janë ende duke vijuar, ka bërë të ditur policia e kryeqytetit kroat.