Rrjeti publik WiFi4WB shënon sukses në Kosovë me mbi 1.1 milion kyçje në internet

Iniciativa për internet falas në hapësirat publike nëpërmjet rrjetit WiFi4WB ka arritur shifrën e mbi 1.1 milion lidhjeve të regjistruara në të gjithë territorin e Kosovës. Vetëm në ambientet e Bibliotekës Kombëtare të Kosovës janë regjistruar mbi 14 mijë kyçje brenda një afati prej rreth gjashtë javësh. Këto shifra u publikuan gjatë konferencës “Gati për t’u Lidhur: Festimi i përfundimit të shtrirjes së WiFi4WB në Kosovë”, ngjarje kjo që shënoi finalizimin e vendosjes së këtij rrjeti në 33 komuna dhe 43 lokacione anembanë vendit. Ministri i Digjitalizimit dhe Administratës Publike, Lulëzon Jagxhiu, u shpreh se sukseset e këtij projekti nuk maten thjesht përmes numrit të pajisjeve të instaluara, por nga shkalla e shfrytëzimit të tyre në përditshmëri nga qytetarët. Jagxhiu: Interneti i falas në hapësirat publike krijon qasje më të lehtë në informacion “Jemi mbledhur këtu në bibliotekën kombëtare në Prishtinë, në kryeqytet, për të shënuar përfundimin e shtrirjes së këtij rrjeti në 33 komuna të Kosovës, në gjithsej 43 lokacione. Nga sheshi i Podujevës deri te biblioteka kombëtare këtu në Prishtinë, kemi përmbyllur një projekt që tashmë po i shërben qytetarëve në mbarë vendin. Dhe ajo që është veçanërisht e rëndësishme është se rezultatet nuk maten vetëm me numrin e pikave të instaluara, por edhe me përdorimin real të tyre. Mbi 1.1 milion lidhje në internet tashmë janë regjistruar përmes rrjetit Wi-Fi për Western Balkans në Kosovë, vetëm këtu në Bibliotekën Kombëtare janë regjistruar mbi 14 mijë lidhje brenda një periudhe prej rreth 6 javësh. Këto shifra dëshmojnë se kjo infrastrukturë po përdoret dhe po krijon vlerë konkrete për qytetarët. Interneti i falas në hapësirat publike e krijon mundësi studentëve të mësojnë, qytetarëve të përdorin shërbime elektronike, bizneseve të vogla të zhvillojnë aktivitetin e tyre dhe vizitorëve të kenë qasje më të lehtë në informacion”, tha Jagxhiu. Në të njëjtën linjë, kryetari i Komunës së Prishtinës, Përparim Rama, vuri në pah rëndësinë e disponueshmërisë së internetit pa pagesë në zonat publike, duke nënvizuar se kjo lehtëson dukshëm proceset e mësimnxënies, punësimit dhe qasjen e shpejtë në shërbime të ndryshme. Rama: Internet falas në hapësira publike, në 33 komuna të vendit “Sot, nga Prishtina, shënojmë përfundimin e shtrirjes së projektit WiFi4WB në të gjithë Kosovën, internet falas në hapësira publike, në 33 komuna të vendit. Për një student, kjo lidhje mund të jetë qasje në dije. Për një të ri, mund të jetë mundësia për të aplikuar për punën e parë. Për një qytetar, mund të nënkuptojë kryerjen e një shërbimi pa humbur kohë në radhë. Në pikat WiFi4WB në Kosovë janë regjistruar mbi 1.1 milion kyçje. Vetëm këtu, në Bibliotekën Kombëtare, janë regjistruar më shumë se 14 mijë kyçje brenda vetëm disa javësh. Këto shifra dëshmojnë nevojën. Ato tregojnë se sa shumë shfrytëzohet një mundësi kur ajo u vihet në dispozicion qytetarëve”, tha Rama. Nga ana e tij, shefi i Çështjeve Politike në Zyrën e Bashkimit Evropian në Kosovë, Boguslaw Getruda, e cilësoi këtë nismë si një arritje të prekshme që u ofron qytetarëve mundësinë e drejtpërdrejtë për të shfrytëzuar internetin pa pagesë në ambientet e hapura. Getruda: Në të gjithë Kosovën janë regjistruar më shumë se 1.1 milion hyrje në rrjet “Ky është një rezultat konkret, të cilin qytetarët mund ta përjetojnë drejtpërdrejt, duke pasur mundësi të lidhen falas me internetin në hapësirat publike në 33 komuna të vendit. Deri më tani, në këto pika të qasjes në internet në të gjithë Kosovën janë regjistruar më shumë se 1.1 milion hyrje në rrjet. Ky është një numër mbresëlënës, që dëshmon si kërkesën e madhe, ashtu edhe vlerën praktike të kësaj nisme."