Vazhdojnë lëvizjet e bujshme: Kampioni i Kosovës, Trepça, zyrtarizon përforcimin e radhës

Klubi i basketbollit Trepça, aktualisht kampion në fuqi i Kosovës, ka forcuar ndjeshëm radhët e tij me një tjetër emër cilësor për edicionin e ri. Bëhet fjalë për basketbollistin James Graham, i cili i bashkohet skuadrës mitrovicase pas eksperiencës së fundit që pati në kampionatin holandez me skuadrën Rotterdam City Basketball. Gjatë edicionit të kaluar në elitën e basketbollit të ligës BNXT, Graham ishte ndër lojtarët kryesorë të skuadrës së tij. Ai u aktivizua në 32 sfida, duke regjistruar një mesatare mbresëlënëse prej 17.7 pikëve dhe 6.3 kërcimeve për ndeshje, ndërsa spikati edhe për saktësinë e tij prej 42% në gjuajtjet për tri pikë. Tani mbetet për t'u parë se sa shpejt do të arrijë të përshtatet me ritmin dhe skemat e basketbollit kosovar, teksa debutimi i tij në parket pritet të ndodhë shumë shpejt.