Limaj kundër Gjykatës Speciale: Nuk kanë autoritet mbi Kuvendin, arroganca e tyre është e papranueshme

Kryetari i Nismës Socialdemokrate, Fatmir Limaj, ka hedhur dyshime të forta mbi ndikimin e Dhomave të Specializuara ndaj legjislativit të Kosovës, duke theksuar se projektligji për ndryshimin e Ligjit për Gjykatën Speciale nuk mund të zhbëhet, pavarësisht presioneve që po ushtrohen. Në një paraqitje televizive, Limaj u shpreh se beteja juridike dhe politike sapo ka filluar. Sipas tij, Gjykata e Specializuar ka mandat të kufizuar vetëm në aspektin lëndor dhe në asnjë rrethanë nuk gëzon autoritet për të mbikëqyrur apo diktuar vendimet e Kuvendit të Kosovës. “Kush ka të drejtë të rrëzojë vullnetin e 90 deputetëve? Gjykata e Hagës ka kompetenca të qarta lëndore dhe asgjë më shumë. Ajo nuk ka dhe nuk duhet të ketë kurrë kontroll mbi Parlamentin e Kosovës”, deklaroi Limaj, duke shtuar se institucionet e Kosovës nuk duhet të lejojnë një cenim të tillë të sovranitetit. Lideri i Nismës kritikoi ashpër ata që iniciuan themelimin e këtij institucioni, duke theksuar se argumentet juridike dhe politike janë aktualisht në anën e Kosovës. Ai vlerësoi se ata që kërkuan krijimin e Gjykatës kanë humbur çdo kredibilitet moral dhe politik, pasi realiteti ka dëshmuar se pretendimet e tyre kanë qenë të pabaza. Në fund, Limaj nuk kurseu as kritikat për qasjen e përfaqësuesve të Dhomave të Specializuara, duke e cilësuar si arrogante mënyrën se si ata kërkojnë të konsultohen me institucionet vendore. “Kush janë ata që kërkojnë të konsultohemi? Ne i kemi krijuar, prandaj kjo arrogancë është krejtësisht e pakuptimtë”, përfundoi ai.