Prishtina synon fondet evropiane: Përparim Rama pret në takim zyrtaren e lartë të Këshillit të Evropës

I pari i Prishtinës, Përparim Rama, ka zhvilluar një takim të rëndësishëm në Odën e Kryeqytetit me Claudia Lucianin, e cila mban postin e drejtoreshës së Kongresit të Autoriteteve Lokale dhe Rajonale të Këshillit të Evropës. Përmes një komunikimi në rrjetet sociale, Rama bëri të ditur se gjatë kësaj bisede u trajtuan sfidat me të cilat përballen komunat, konsolidimi i demokracisë lokale, si dhe nevoja e madhe për një koordinim më efektiv ndërmjet pushtetit qendror dhe atij lokal. “Po ashtu, theksuam rëndësinë që komunat të kenë qasje më të drejtpërdrejtë në fondet evropiane dhe ndërkombëtare. Kryeqyteti mbetet i përkushtuar ndaj fuqizimit të vetëqeverisjes lokale dhe bashkëpunimit me partnerët evropianë”, ka nënvizuar kreu i Prishtinës.