Abrashi: Zgjedhja e presidentes shënoi një kthesë historike, pa ndërhyrje dhe 'zarfe' ndërkombëtare

Deputeti i Lëvizjes Vetëvendosje, Artan Abrashi, ka vlerësuar se procesi i zgjedhjes së presidentes së Kosovës përmes marrëveshjes me Partinë Demokratike të Kosovës, përfaqëson një moment kyç për konsolidimin e politikës vendore. Në një diskutim televiziv, Abrashi nënvizoi se ky ishte rasti i parë kur vendi arriti ta tejkalojë një proces të tillë të rëndësishëm pa presionet ose kushtëzimet e zakonshme nga ana e faktorit ndërkombëtar. Sipas tij, për një periudhë të gjatë, zgjidhja e krizave politike në Kosovë ka qenë e varur nga ndërmjetësimi i huaj. Ai e cilësoi si një hap drejt pjekurisë politike faktin që dy subjekte me qëndrime diametralisht të kundërta, si LVV-ja dhe PDK-ja, gjetën gjuhë të përbashkët. Abrashi vlerësoi se ky bashkëpunim është realizuar në mënyrë transparente përballë qytetarëve, duke u distancuar nga praktikat e së shkuarës. “Ne shpesh harrojmë se zgjidhja e krizave në Kosovë ka qenë thuajse në një inkubator ndërkombëtar. Kjo është hera e parë që zgjedhim presidentin pa ndërhyrje, pa presione, pa kushtëzime dhe pa 'zarfe'. Mund të thuhet se klasa politike është lënë, apo ndoshta edhe është braktisur nga ndërkombëtarët, duke u detyruar të marrë përgjegjësi. Fakti që dy forca antagoniste si LVV dhe PDK arritën një marrëveshje të hapur, para syve të publikut, është një dëshmi e qartë e pjekurisë sonë politike”, deklaroi Abrashi.