Procesi i anëtarësimit në BE, komisioneri evropian McGrath pas takimit me Ramën: Shqipëria është në rrugën e duhur

Komisioneri i Bashkimit Evropian për Demokracinë, Drejtësinë, Sundimin e Ligjit dhe Konsumatorët, Michael McGrath, ka shprehur mbështetjen e fortë për perspektivën evropiane të vendit, duke e cilësuar atë si një nga shtetet udhëheqëse në këtë drejtim. Përmes një postimi në rrjetet sociale, menjëherë pas përfundimit të takimit me kryeministrin Edi Rama, zyrtari i lartë evropian theksoi se e ardhmja e Shqipërisë është brenda Bashkimit Evropian, ndërkohë që vuri në dukje se mbetet ende punë e rëndësishme për t'u finalizuar. “Shqipëria e ka vendin në BE dhe është një nga vendet pararendëse në procesin e anëtarësimit në BE”, është shprehur McGrath në mesazhin e tij. Në vijim të deklaratës, ai garantoi se Brukseli do të vazhdojë të qëndrojë pranë Shqipërisë, duke i ofruar mbështetje të plotë në çdo fazë të këtij rrugëtimi eurointegrus. Gjatë bisedës me kreun e ekzekutivit shqiptar, në qendër të vëmendjes ishin arritjet e deritanishme në fushën e drejtësisë dhe sundimit të ligjit, të cilat McGrath i cilësoi si shtyllën kryesore politike të negociatave për anëtarësim. Në këtë kuadër, komisioneri evropian nuk la pa përmendur dhe vlerësuar angazhimin e kabinetit qeverisës për hapat e hedhur deri më tani. “Ka një historik të fortë progresi dhe një ambicie të qartë. Tani, ky ritëm duhet të ruhet për të dhënë rezultate të qëndrueshme dhe të pakthyeshme”, përfundoi McGrath.