Tetori Rozë: Apeli për diagnostikim të hershëm dhe rëndësia e kontrolleve gjatë gjithë vitit

Kosova ka intensifikuar fushatat e ndërgjegjësimit, thirrjet për ekzaminime mjekësore dhe aktivitetet e dedikuara për parandalimin e kancerit të gjirit. Muaji tetor, i njohur botërisht si periudha e ndërgjegjësimit për këtë sëmundje, shërben si një kujtesë e fuqishme se shëndeti nuk duhet të neglizhohet dhe se zbulimi i hershëm mbetet arma më e fortë në luftën kundër kësaj diagnoze. Në Qendrën Kryesore të Mjekësisë Familjare (QKMF), sektori i radiologjisë ka regjistruar një fluks të shtuar të grave që kërkojnë shërbime diagnostikuese. Sipas shefes së këtij sektori, Edita Bajraktari, vetëm në ditët e fundit janë evidentuar dy raste të dyshuara, ndërsa vërehet një interesim më i lartë i pacienteve për t'u kontrolluar. Bajraktari thekson domosdoshmërinë e vetëkontrollit dhe vizitave të rregullta te mjeku. Ajo nënvizon se, pavarësisht rritjes së interesimit gjatë tetorit, gratë duhet të jenë të ndërgjegjshme se mamografia është një shërbim pa pagesë që ofrohet përgjatë gjithë vitit, duke u bërë thirrje atyre që të mos presin vetëm muajin e ndërgjegjësimit për t'u kujdesur për veten. Ky mesazh përkrahët fuqishëm edhe nga Nafije Latifi, e cila ka kaluar sfidën e kancerit të gjirit. Ajo bën thirrje për një angazhim institucional dhe shoqëror të vazhdueshëm, duke kërkuar që pacientja të vihet në qendër të çdo vendimmarrjeje, pasi pas çdo diagnoze qëndron një jetë dhe një familje që ka nevojë për mbështetje. Në kuadër të aktiviteteve të këtij muaji, nëpër shumë qytete të Kosovës janë vënë në dispozicion mamografë mobilë për të lehtësuar qasjen e qytetareve në shërbimet shëndetësore. Ndërkohë, drejtori i Klinikës së Onkologjisë në QKUK, Ilir Kurtishi, ka bërë të ditur se gjatë këtij viti janë regjistruar rreth 300 raste të reja të kancerit të gjirit, një shifër kjo që rezulton të jetë e përafërt me statistikat e vitit të kaluar.