Haxhiu: Gjermania, mbështetëse e palëkundur dhe partnere kyçe në ecurinë e Kosovës

Kryetarja e Kuvendit të Kosovës, Albulena Haxhiu, ka vlerësuar se vendi ynë gëzon tashmë një lajm jashtëzakonisht pozitiv për sa i përket stabilitetit institucional, pas zgjedhjes së Justina Shiroka-Pulës në krye të shtetit si presidente e re e Republikës së Kosovës. “Presidentja Justina Shiroka-Pula është presidentja e tretë grua e zgjedhur, në fakt e katërta nëse llogarisim edhe periudhën time si ushtruese e detyrës së presidentes. Edhe në Kryesinë e Kuvendit gratë janë fuqishëm të përfaqësuara. Nga gjashtë anëtarë, katër janë gra: unë si kryetare dhe tri nënkryetare, përfshirë edhe zonjën Rexhepi, e cila është me ne sonte”, u shpreh ajo gjatë fjalës së saj. Sipas kreut të Kuvendit, shteti gjerman e vlerëson në masë të madhe peshën e gjinisë femërore në funksionet drejtuese. “Sot kujtojmë suksesin e ribashkimit të qytetarëve gjermanë, i cili i dha fund dekadave të ndarjes dhe hapi mundësi të reja”, theksoi Haxhiu. Gjatë ceremonisë solemne për nder të Ditës së Bashkimit të Gjermanisë, ajo përmendi datën 3 tetor 1990, kur gjermanët u bashkuan sërish nën një shtet të vetëm. “Për shumë familje, kjo ishte një ngjarje që do të përcaktonte jetën e tyre. Vizitat te të afërmit, kthimi në shtëpi dhe zgjedhja e lirë e vendbanimit ishin pjesë e një lirie që më parë u ishte mohuar”, u shpreh kryeparalmentarja Haxhiu. “Kur kujtojmë Bashkimin e Gjermanisë, kujtojmë edhe guximin e qytetarëve që dolën në rrugë në mënyrë paqësore, duke kërkuar të drejtën për të vendosur për jetën e tyre. Ata nuk e dinin me siguri se çfarë do të sillte dita e nesërme, megjithatë besuan se ndryshimi ishte i mundur dhe morën rrezikun për ta kërkuar atë”, shtoi ajo. Duke vënë in and thelbin e marrëdhënieve dypalëshe, kryetarja e Kuvendit të Kosovës, Albulena Haxhiu, veçoi se Gjermania mbetet një shtet me të cilin ndajmë lidhje të ngushta familjare. “Në vitet më të vështira për Kosovën, Gjermania hapi dyert për shumë familje që u detyruan të largoheshin nga shtëpitë e tyre. Ajo ishte aty për refugjatët dhe për njerëzit që qëndruan pranë tyre. Gjermania ka qenë një partnere e fuqishme në zhvillimin e vendit dhe ishte ndër vendet e para që njohu pavarësinë e Kosovës. Mbështetja e saj na shoqëroi në rindërtimin e institucioneve dhe në përpjekjet tona për t’u ofruar qytetarëve një perspektivë më të mirë. Sot, marrëdhëniet tona pasqyrojnë peshën e shumë kosovarëve që jetojnë dhe punojnë në Gjermani. Ata janë pjesë e shoqërisë gjermane dhe mbeten të lidhur me vendin e tyre. Përmes punës dhe miqësive të tyre, ata i afrojnë dy vendet tona”, përfundoi ajo.