Policia e Kosovës jep paralajmërimin e prerë: S’ka fushatë zgjedhore të Serbisë brenda vendit

Autoritetet e rendit në Republikën e Kosovës kanë konfirmuar se nuk do të lejojnë në asnjë mënyrë zhvillimin e aktiviteteve dhe fushatave parazgjedhore për zgjedhjet e Serbisë në territorin e Kosovës. Ky q qëndrim është bërë i ditur nga zëvendësdrejtori i Policisë së Kosovës për rajonin e veriut, Veton Elshani, i cili ka njoftuar gjithashtu për ndërhyrjen e forcave të rendit në një ngjarje të organizuar në Mitrovicën e Veriut. Elshani ka theksuar se strukturat policore veprojnë mbi bazën e urdhrave të qarta nga eprorët e tyre, të cilët kanë ndaluar rreptësisht çdo lloj organizimi apo tubimi që ndërlidhet me proceset zgjedhore të shtetit fqinj brenda kufijve të Kosovës. “Vetëm mundem me të treguar që ne e kemi udhëzim prej eprorëve tanë, vendim që nuk lejohet mbajtja e fushatës parazgjedhore, zgjedhore të Serbisë në Kosovë dhe një gjë e tillë nuk do të lejohet”, ka deklaruar Elshani gjatë prononcimit të tij. Lidhur me situatën në terren, ai ka bërë të me dije se gjatë ditës së mërkurë është regjistruar një tentativë për mbajtjen e një aktiviteti të tillë në Mitrovicën e Veriut, ku ishin grumbulluar përafërsisht 200 punonjës të arsimit. “Një rast dje ka qenë, kanë qenë rreth 200 arsimtarë, mësues. I kanë ftuar Lista Serbe për me ju treguar se si duhet votuar, çka të bëjnë. Kjo ka qenë informata jonë. Kur kemi shkuar, ata kanë thënë që tubimi ka qenë në lidhje me integrimin e shkollave, pastaj janë larguar”, ka përfunduar Elshani.